Ka dështuar të mbahet mbledhja e jashtëzakonshme e Kuvendit Komunal të Prishtinës, e cila u thirr me iniciativë të kreut të kryeqytetit, Përparim Rama, e ku si pikë të vetme e rendit të ditës ishte Plani Zhvillimor Komunal.
Të pranishëm në sallën kuvendare ishin vetëm 21 asamblistë komunal të cilët nuk përbënin kuorumin e nevojshëm për të vazhduar me seancën e jashtzakonshme.
“Sipas shërbimit të kuvendit nuk kemi kuorum për të mbajtur mbledhjen në mungesë të të gjithë asamblistëve të LVV-së dhe PDK-së”, tha kryesuesi i kuvendit komunal, kur e mbylli takimin.
Pas dështimit për t’u mbajtur kjo mbledhje e jashtëzakonshme, kryetari Përparim Rama akuzoi opozitarët komunal se po e bllokojnë këtë dokument që të dalë në diskutim publik, ndërkohë që tha se të njëjtin po thirren në transparencë.
“Sot ishim për ta vendosur në diskutim publik Planin Zhvillimor Komunal, një dokument i gatshëm tashmë një vit e gjysmë që bllokohet gjatë gjithë kohës nga opozita, nga LVV-ja e nga PDK-ja. Siç e patë edhe sot nuk ishin ata asamblistë këtu, ata që janë të votuar nga qytetarët e kryeqytetit. Ata thirren në jotransparencë, pra është e kundërta e asaj çka po kërkojmë. Një dokument që është i gatshëm për diskutim publik, t’i paraqitet publikut, ta rishikojmë së bashku, të japim komente, propozime të reja apo ndryshime. Tentojmë për një transparencë që një vit e gjysmë e vazhdon bllokimi i këtij dokumenti”, tha ai.
Gjatë kësaj konference, Rama pati përplasje me ish-nënkryetarin e Komunës së Prishtinës, Dardan Sejdiu, i cili në rolin e qytetarit e pyeti se sa lagje të kryeqytetit e kanë parë këtë plan zhvillimor?
“Ja që njerëz si ti që japin dezinformata, që i rrejnë të gjithë, që i rrejnë njerëzit e kryeqytetit”, i tha Rama Sejdiut derisa ky i fundit i tha se pyetjen ia drejtoi si një qytetar.
“A ia nise ti a? Si njeri, si qytetar po të pyes” i tha Sejdiu Ramës.
Kryetari Rama tha se në të gjitha lagjet e kanë diskutuar, dhe vazhdojnë t’i kenë diskutimet publike për këtë dokument.
