Dhoma e Përfaqësuesve të SHBA-së ka miratuar një projekt-ligj që mund të ndalojë përdorimin e aplikacionit TikTok në SHBA , nëse nuk largohet nga kompania e saj mëmë kineze “ByteDance”.
Projektligji kaloi me 360 vota pro dhe vetëm 58 kundër. Pritet të shkojë në Senat për votim javën e ardhshme.
TikTok, popullariteti i të cilit është veçanërisht i madh midis brezave të rinj , kritikoi projektligjin duke paralajmëruar se, nëse miratohet, legjislacioni “do të shkelë të drejtat e fjalës së lirë të 170 milionë amerikanëve, do të shkatërrojë 7 milionë biznese dhe do të mbyllë një platformë që kontribuon me 24 miliardë dollarë në ekonominë amerikane, çdo vit”.
Ky projektligj i jep pronarit kinez ByteDance nëntë muaj për të shitur aplikacionin.
Lidhur me këtë projektligj ka patur dhe kundërshtarë ku një prej tyre është dhe miliarderi Elon Musk, i cili tani zotëron platformën e mediave sociale X, dikur Twitter.
“TikTok nuk duhet të ndalohet në SHBA, edhe pse një ndalim i tillë mund të përfitojë nga platforma X. Të bësh këtë do të ishte në kundërshtim me lirinë e fjalës dhe të shprehjes” tha ai.
