Shkruan: Syzana Bunjaku Murtezaj
Ajo ditë në Kuvendin e Kosovës mbetet një prej momenteve më të bukura që kam përjetuar si gazetare. Salla kishte një atmosferë ndryshe, të ngarkuar me emocion, pritje dhe një lloj heshtjeje që dukej se mbante brenda frymën e gjithë vendit. Derisa qëndroja mes kolegëve të mi më dukej sikur po bëhesha dëshmitare e një kapitulli të ri të historisë sonë.
Çdo ngritje dore, çdo votë, çdo fjalë e deputetëve rezononte me një ndjenjë përgjegjësie që rrallë herë e sheh në politikë.
Kur u lexuan rezultatet e votimit të neneve që i hapnin rrugë shtrirjes dhe transformimit të FSK-së në ushtri, në sallë u ndje një shpërthim i brendshëm emocioni i fuqishëm. Ishte si një valë krenarie që kaloi nëpër të pranishmit, një ndjenjë e përzier me kujtime, sakrifica dhe shpresë.
Si gazetare, e dija se po shkruaja për një ngjarje të madhe, por si qytetare, e ndjeva edhe më thellë. Ishte një moment kur fjala “ushtri” nuk ishte thjesht institucion, por simbol i rrugëtimit tonë, i sakrificave të njerëzve që nuk janë më, i brezave që e kanë ëndërruar këtë ditë.
Kujtojmë se më 14 dhjetor 2018, Kuvendi i Republikës së Kosovës votoi dhe miratoi tri ligje kyçe, të cilat shënuan lindjen e Ushtrisë së Kosovës.
Foto e gazetarëve që raportuan nga Kuvendi i Kosovës
