Gjykata Themelore në Prishtinë edhe në rivendosje, ka marrë vendim, me të cilin ka refuzuar kërkesën e Prokurorisë Speciale të Republikës së Kosovës për caktimin e masës së paraburgimit ndaj policit Aurel Kaziu, si dhe Edmir Ahmagjokajt dhe Ardit Laskas, të dyshuar për shpërlarje të parave rreth 1 milion euro, shumë me të cilën më 24 shkurt 2026 u kapën në pikën kufitare në Merdar.
“REFUZOHET kërkesa e prokurorisë Speciale të Republikës së Kosovës PPS.nr.32/2026 e datës 25.02.2026 për caktimin e masës së paraburgimit”, thuhet në vendimin e 9 marsit 2026, raporton “Betimi për Drejtësi“.Të dyshuarit do të mbrohen në liri.
Sipas Themelores, kërkesa e Prokurorisë është e pabazuar.
Gjykata gjeti se në këtë rast nuk përmbushet kushti thelbësor nga neni 184, par.1, pika 1.1 të Kodit të Procedurës Penale, përkatësisht Prokuroria nuk arriti të vërtetojë se ekziston dyshimi i bazuar se të pandehurit kanë kryer veprën penale për të cilën dyshohen.
Sipas vendimi, të kërkesë, prokurori i shtetit nuk përmend askund, nuk përshkruan e as nuk thirret në asnjë provë për të mbështetur dyshimin e bazuar se të pandehurit e kanë kryer veprën penale për të cilën dyshohen.
“Pra, fakti se kontrolli është kryer në prani të të pandehurve dhe se gjatë kontrollit janë gjetur mjete monetare, është vetëm pretendim i prokurorisë i paraqitur në kërkesë për caktimin e paraburgimit dhe në kallëzim penal të doganës, mirëpo në momentin e vendosjes nga ana e
gjyqtarit të procedurës paraprake në lidhje me kërkesën për caktimin e paraburgimit, nuk ka pasur asnjë provë që e vërteton këtë pretendim”, thuhet në vendim.
Gjykata mbetet pranë qëndrimit se në këtë rast mungojnë dy nga provat kryesore, pa të cilat nuk mund të krijohet dyshimi i bazuar.
Në vendim, thuhet se Gjykata nuk mund të mbështetet vetëm në supozime të Prokurorisë, se pasuria e caktuar është gjetur te personi i caktuar, pa pasur dhe siguruar provat nga ana e Prokurorisë që detyrimisht kërkohen nga ligji.
“Faktet apo rrethanat faktike në procedurë penale janë objektit shqyrtimi, nuk janë mjete prove”, thuhet në vendim.
Pra, thuhet se në fazën e vendosjes nga gjyqtari i procedurës paraprake lidhur me kërkesën për caktimin e paraburgimit, ka munguar prova që garanton se mjetet e pretenduara monetare, janë gjetur te këtu të pandehurit.
“Andaj, gjykata e shkallës së parë me bindje të plotë mbetet pranë qëndrimit se në kohën kur është vendosur për kërkesën e Prokurorisë Speciale për caktimin e masës së paraburgimit, nuk është vërtetuar dyshimi i bazuar se të pandehurit e kanë kryer veprën penale për të cilën dyshohen”, thuhet në vendim.
Fillimisht, Gjykata Themelore në Prishtinë, Departamenti Special më 27 shkurt 2026 mori vendim me të cilin ka refuzuar kërkesën e Prokurorisë Speciale të Republikës së Kosovës për caktimin e masës së paraburgimit ndaj policit Aurel Kaziu, si dhe Edmir Ahmagjokajt dhe Ardit Laskas.
Por, Gjykata e Apelit– Departamenti Special anuloi vendimin e Gjykatës Themelore në Prishtinë dhe e ktheu çështjen në rivendosje për tre të dyshuarit.
Çka thuhej në kërkesën e Prokurorisë?
Ndërkaq, në kërkesën e Prokurorisë Speciale të përpiluar më 25 shkurt 2026, thuhet se ekziston dyshimi i arsyeshëm se të pandehurit Edmir Ahmagjokaj, Aurel Kaziu dhe Ardit Laska, me dashje dhe duke e ditur se pasuria e caktuar është e fituar përme aktiviteti kriminal, më 24 shkurt 2026 kanë hyrë në territorin e Republikës së Kosovës përmes pikës kufitare në Merdar, me automjet të tipis ‘Sprinter’, të cilin e drejtonte pandehuri Ahmagjokaj, e në automjet ndodheshin edhe të pandehurit Kaziu dhe Laska.
Sipas kërkesës së Prokurorisë, gjatë kontrollit nga zyrtarët doganorë, pasi janë pyetur nëse posedonin diçka për deklarim, ata kanë deklaruar rrejshëm se nuk kishin asgjë për të deklaruar, me qëllim fshehjen dhe maskimin e burimit, dhe se pas kalimit të automjetit në skaner, janë vërejtur dendësi te theksuara dhe vijëzime jo të zakonshme në pjesën e poshtme të automjetit.
Ndërsa, thuhet se gjatë kontrollit të detajuar, nga zyrtarët doganorë në bashkëpunim me Policinë e Kosovës, duke përdorur pajisje teknike, në një hapësirë të modifikuar në bunker, brenda janë gjetur 18 pako me bankënota të prerjeve 10€, 20€, 50€, 100€ dhe 200€, në shumë të përgjithshme sipas vlerësimit fillestar rreth 1 milion euro.
Me këto veprime, thuhet se të pandehurit në bashkëkryerje, kanë fshehur dhe maskuar, burimin dhe vendndodhjen e pasurisë që përbënte fitime nga aktivitet kriminal, kanë transportuar dhe tentuar t’i transferojne mjete financiare me qëllim paraqitjen e tyre si të ligjshme, kanë poseduar dhe ushtruar kontroll mbi këto mjete financiare, duke qenë në dijeni për origiinën e tyre të kundërligjshme.
Me këtë, të pandehurit dyshohen se në bashkëkryerje kanë kryer veprën penale “Shpëlarja e parave” nga neni 302 lidhur me neni 31 të Kodit Penal të Republikës së Kosovës, lidhur me nenin 56, par.1, pika 1.1 të Ligjit për Parandalimin e Pastrimit të Parave dhe Luftimin e Financimi të Terrorizmit.
Aty thuhet se në deklaratën e dhënë para hetuesve doganorë, Ahmagjokaj deklaroi se s’kishte dijeni për paratë e gjetura në furgon.
Kurse, Kaziu thuhet se deklaroi që ishte nisur nga Tirana për në Gjermani me një furgon blu, të cilin e kishte ndryahur në Kosovë me atë që u ndalua nga Dogana. Tha se furgonin e mori nga kompania, duke shtuar se nuk kishte dijeni për paratë e konfiskuara. Ndërkaq shtoi se kishte qëndruar një natë në Gjermani dhe më pas janë takuar me Ahmagjokajn, duke vazhduar udhëtimin për në Shqipëri.
Edhe Laska, sipas Prokurorisë, mohoi çdo lidhje me paratë e konfiskuara. Tha se më 23 shkurt u nisën bashkë me dy të padehurit tjerë nga Gjerania në Shqipëri.
Në kërkesë, Prokuroria kishte vlerësuar se janë përmbushur kushtet për caktimin e paraburgimit: të pandehurit dyshohen për kryerjen e veprave penale serioze, ekziston rreziku i ikjes në rast se lihen në liri, ekziston rreziku i asgjësimit, fshehjes apo ndryshimit ose falsifikimit të provave, dhe se pesha e veprës penale është e rëndë dhe ka rrezikshmëri të lartë shoqërore.
