Shkruan: Enis Sulstarova
Kush ka lexuar pak sociologji e di se shndërrimi rrënjësor që ka pësuar familja në modernitet i detyrohet efektit gërryes qe kapitalizmi ka pasur në marrëdhëniet shoqërore tradicionale. Me fjalë të tjera, mënyra kapitalisto-industriale e prodhimit çoi në urbanizimin e pandalshëm dhe migrimin fshat-qytet. Nga familja e zgjeruar si njësi prodhimi u kalua te familja bërthamë, e cila idealisht është njësi konsumi.
Tani është familja bërthamë që po ndodhet përballë trysnisë së ekonomisë kapitaliste dhe individualizimit që e shoqëron. Prindërit kalojnë më shumë kohë në punë ose emigrojnë, të rinjtë e papunë ose ata me paga të ulëta u duhet të kalojnë më shumë kohë për studime dhe kualifikime që të jenë konkurrues në tregun e punës dhe për pasojë vonojnë krijimin e familjeve etj. Varfëria është shkaku kryesor për dhunën në familje dhe ndarjet. Shoqërizimi i fëmijëve që dikur behej kryesisht ne familje tani i besohet institucioneve arsimore. Degradimi i këtyre të fundit, për shkak të mosfinancimit, do të thotë edhe degradim moral dhe psikologjik i brezit të ri. Gjithashtu, masmediat e kanë humbur prej kohësh funksionin edukues, tani po humbin edhe funksionin informues, duke u kthyer në mjete argëtimi, shpeshherë duke mos marrë parasysh efektin e dëmshëm te fëmijët.
Në këto kushte, shteti social merr përsipër të zbusë efektet gërryese të kapitalizmit neoliberal, me anë të mbështetjes së familjeve, nënave lehone, grave që punojnë, sistemit arsimor, punësimit të të rinjve, ndërtimit të banesave të përballueshme etj. Këtë rrugë ka ndjekur qeveria Kurti 2 dhe do ta vijoje ne mandatin e ardhshëm.
Të jesh “pro familjes” vetëm se je kundër (në varësi të botëkuptimit) konceptimeve alternative ndaj familjes bërthame, nuk mjafton. Duket të kesh përgjigje ndaj problemeve strukturore me te cilat përballet çdo familje. Nuk themi që LVV ka shkopin magjik, sepse problemet familjare nuk do të zhduken, me to do të përballemi përditë, por kur ke aleate institucionet publike, detyra e prindërve lehtësohet. Prandaj mendoj se rruga social-demokratike e LVV është e duhura.
