Me rastin e Europianit të Futbollit që do të startojë muajin ardhshëm në Gjermani, organizatorët e këtij eventi kanë parashikuar dhe shumë ngjarje të tjera kulturore dhe sportive që do të shoqërojnë kompeticionin e lojës më të ndjekur në botë.
Një prej tyre është dhe ekspozita “In motion – Art & Football” që do të vendoset në Muzeun e Futbollit Gjerman, në Dortmund.
Pjesë e kësaj ekspozite do të jetë dhe tabloja e piktorit Guri Madhi, “Kur nuk shkojnë në stadium”, e realizuar në vitin 1986.
Ekspozita gërsheton botën e futbollit dhe të artit dhe është e vendosur në një sipërfaqe prej rreth 1000 metrash katrorë.
Lajmi u dha nga kryeministri Edi Rama në Facebook.
“PIKTURA SHQIPTARE NË EURO2024. Kur nuk shkojnë në stadium”, e realizuar në vitin 1986, nga piktori Guri Madhi, bëhet pjesë e ekspozitës “In motion – Art & Football” në Muzeun e Futbollit Gjerman, në Dortmund. Ekspozita gërsheton botën e futbollit dhe të artit. Në një sipërfaqe prej rreth 1000 metrash katrorë, një instalacion hapësinor mundëson ndërveprim mes veprave artistike që trajtojnë temën e futbollit në modernizmin europian të shekullit të 20-të”, shkruan Rama.
