Shkolla Fillore e Mesme e Ulët “Mehmet Gjevori” prej shtatori të këtij viti ka filluar implementimin e projektit “Ora e leximit”, projekt ky i cili u dedikohet fëmijëve të klasave prej 6 deri në 9.Fatmir Fejziu, mësimdhënës i shkollës “Mehmet Gjevori”, theksoi se ky projekt është jashtëzakonisht i qëlluar, Sipas tij, duhet të fokusim te lexim-kuptimi.
“Nuk është qëllimi vetëm të lexojmë, por edhe të kuptojmë, t’i shmangemi mësimit tradicional ta bëjmë edhe sqarimin e koncepteve të panjohura përmes strategjive që parashihen me këtë projekt, të realizohet një orë interesante e motivuese për nxënësit”, ka theksuar ai.
Fejziu në “Mirëmëngjesi Kosovë”, ka thënë se projekti është mjaft serioz dhe fillimisht është ndjekur një trajnim që ka të bëjë me lexim-kuptimin që u organizua nga organizata “Librari projekt” ku është përfituar mjaft.
Sipas tij, projekti ka vlerë nga përvoja e mëhershme, duke e ditur që leximi është mjaft i rëndësishëm për nxënësit, sidomos kohëve të fundit, kur vërshojnë rrjetet sociale dhe nxënësit janë të ndikuar prej tyre.
Fejziu ka thënë se nxënësit e kanë mirëpritur këtë, dhe çdo javë u shtohet edhe më shumë motiv.
“I kam paralajmëruar për rëndësinë e leximit, por edhe nxënësit kanë arritur ta kuptojnë çfarë është leximi”, ka theksuar ai.
Më tutje, ai ka thënë se për shkak të ndikimit të rrjeteve sociale, sot leximi nuk duhet të jetë mekanik, por gjithmonë i planifikuar në mënyrë që nxënësi ta kuptojë atë që e lexon.
“Ky trajnim na ka ndihmuar shumë që thjesht të dimë si t’u qasemi nxënësve më mirë dhe thjesht t’i zbatojmë ato strategji të cilat janë të planifikuara për nxënësit në mënyrë që leximi gjithmonë të jetë i kuptueshëm për nxënës”, ka deklaruar Fejziu.
Ky projekt është në funksion në komunën e Prishtinës, në gjithsej 25 shkolla. Trajnimi është bërë me 40 mësimdhënës.
