Drejtori i Institutit Octapus, Arben Fetoshi, ka komentuar performancën e ministrit të Jashtëm serb, Marko Gjuriq, në Këshillin e Sigurimit të Kombeve të Bashkuara në Nju Jork. Sipas Fetoshit, seanca e sotme u shfrytëzua si një platformë për propagandë dhe një “recital i përsëritur i viktimizimit serb”.
“Këshilli i Sigurimit është kthyer në një ‘echo chamber’ të propagandës serbo-ruse për Kosovën. Ministri i Jashtëm serb, Marko Gjuriq me reprizën e “viktimizimit”, duke dezinformuar për “diskriminim institucional, frikësim dhe presion sistematik” ndaj serbëve në Kosovë. Edhe performanca e sotme, një farsë që bazohej në efektet e përsëritjes dhe në shfrytëzimin e seancës si një platformë për ‘ndërkombëtarizimin’ e propagandës. Shifrat pa asnjë shpjegim mbi ‘incidentet etnike’, pretendimi për ‘respektimin e të drejtës ndërkombëtare’ dhe kornizimi i FSK-së si një ‘militarizim që minon stabilitetin rajonal’ u dekonstruktuan aty për aty, jo vetëm nga kryediplomati kosovar, Glauk Konjufca, por edhe nga shumica e vendeve anëtare”, ka shkruar Fetoshi.
Ai tha se po thuajse të gjithë në KS të OKB-së i kërkuan Serbisë përgjegjësi për Radoiçiqin, e disa ia kujtuan se pavarësia e Kosovës është në përputhje me të drejtën ndërkombëtare, duke kërkuar njohjen e saj si zgjidhja e normalizimit dhe si kusht për paqen e qëndrueshme.
Sipas Fetoshit,, Gjuriq nuk e ka problem demantimin, për shkak se ky forum nuk e ka një mekanizëm që sanksionon të vërtetën. “Ajo që ka rëndësi për Serbinë është UNMIK-u si mbetje e Rezolutës 1244, Këshilli i Sigurimit si platformë propagandistike dhe Rusia si aleate e saj në nivelin ndërkombëtar”, ka shtuar ai.
Ai thotë se pjesëmarrja e Gjuriqit në Nju Jork nuk ka për qëllim të ofrojë përgjigje ndaj Shteteve të Bashkuara, Britanisë, Francës apo Kosovës, por të amplifikojë narrativën e viktimizimit. Raportet e UNMIK-ut, sipas Fetoshit, përdoren si “ftesë” për të ricikluar narrativat e gatshme në Beograd, prandaj thotë se Shtetet e Bashkuara refuzojnë këtë qasje, duke kërkuar mbylljen e UNMIK-ut.
“Jo sepse nuk duhet të flitet për Kosovën, por sepse mbyllja e UNMIK-ut do ta reflektonte të vërtetën e Kosovës së pavarur dhe do ta mbyllte një kanal për narrativat e rrejshme serbo-ruse. Forumi i mandatuar për sigurinë dhe paqen ndërkombëtare nuk duhet të shërbejë më si hapësirë për narrativat manipuluese që kërcënojnë stabilitetin në Ballkan”, ka shkruar ndër të tjera Fetoshi.
