Kosova do të jetë pa tre lojtarë të rëndësishëm kundër Zvicrës.
Përveç Vedat Muriqit, Amir Rrahmanit e Edon ZHegrovën është konfirmuar edhe mungesa e Milot Rashica, Ermal Krasniqi dhe portieri Arijanet Muriç.
“Stafi i ekipit Kombëtar të Kosovës njofton opinionin dhe tifozët se për shkak të lëndimeve dhe gjendjes me grip, tre lojtarë do të mungojnë në ndeshjen e sotme kundër Zvicrës. Pas një pune të kujdesshme mjekësore, fatkeqësisht ka rezultuar që futbollistët Milot Rashica, Ermal Krasniqi dhe portieri Arijanet Muriç nuk do të jenë në gjendje të jenë në dispozicion të përzgjedhësit Primozh Gliha në këtë sfidë të rëndësishme”, thuhet në njoftimin e Federatës.
FFK ka konfirmuar edhe arsyet e mungesave.
“Milot Rashica është lënduar në fund të stërvitjes së djeshme dhe pas ekzaminimeve mjekësore është konstatuar se ai nuk do të jetë në gjendje të luajë në ndeshjet kualifikuese kundër Zvicrës dhe Bjellorusisë. Ndërsa Ermal Krasniqi, i cili u lëndua disa ditë më herët, përkundër përkushtimit maksimal të tij dhe stafit mjekësor nuk është në gjendje për të luajtur në ndeshjen e sotme, por po bëhet përpjekje për ta riaftësuar për lojë për sfidën e ardhshme me Bjellorusinë. Ndërkohë, portieri Arijanet Muriç po përballet me një gjendje gripale, e cila ka bërë që ai të mos jetë në gjendje të përfshihet as në stërvitjen e fundit dhe si rrjedhojë do të mungojë edhe në ndeshjen e sotme”, thuhet në njoftim.
Kosova sot do të luajë ndeshjen e radhës kundër Zvicrës, në kuadër të kualifikimeve për Kampionat Evropian.
“Dardanëve” iu duhen tre pikë për të mbajtur gjallë shpresat për kualifikimin në Kampionat Evropian.
