Në Dhomat e Specializuara të Kosovës në Hagë, ka filluar dëshminë dëshmitari i 119-të, në procesin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit.
Dëshmitari është më masa mbrojtëse dhe pyetjet për të i ka filluar prokurori Cezary Mihailzcuk.
Sipas përmbledhjes së lexuar nga ai, dëshmitari pretendohet se është rrëmbyer nga persona me uniforma të UÇK-së dhe u lirua pas negociatave me KFOR-in.
“Në qershor të 1999-ës dëshmitari 02714 u rrëmbye nga persona të armatosur që kishin veshur uniforma të UÇK-së, me shenja dalluese të UÇK-së dhe u dërgua në vende të ndryshme ku u mor në pyetje dhe u keqtrajtua. Ndërkohë që ka qenë i ndaluar, ai ka ndervepruar me komandantin e UÇK-së që në fund e liroi dëshmitarin pas negociatave me KFOR-in”, tha prokurori.
Dëshmitari ka mohuar se kur u ndalua nga UÇK-ja u informua për ndonjë akuzë penale të ngritur kundër tij.
“Ata më thanë se isha ndaluar se isha oficer trafiku rrugor. Kjo ishte arsyeja për këtë arsye më thanë që isha ndaluar. Asgjë tjetër s’më thanë”, ka theksuar ai.
Ai ka mohuar se iu dha mundësia që ta kundërshtojë ndalimin e tij përpara ndonjë gjyqtari ose zyrtari.
Pas përfundimit të pyetjeve nga ZPS-ja dhe me kundërpyetje ka vazhduar mbrojtja e Thaçit, e përfaqësuar nga avokati Luka Mishetiq në seancë private për publikun, shkruan rtk.Në prova materiale, u pranuan deklaratat e mëhershme të dëshmitarit së bashku me materialet përcjellëse dhe u klasifikuan si konfidenciale.
