Udhëheqësi i Hezbollahut, Hassan Nasrallah në fjalimin e tij të parë që nga shpërthimi i luftës, tha se një përshkallëzim më i gjerë rajonal nuk mund të përjashtohet nëse Izraeli vazhdon luftën e tij në Gaza, transmeton Kosova Post.
Qindra mijëra njerëz ndoqën fjalimin e shumëpritur televiziv të së premtes në mitingjet e thirrura nga një grup libanez për të nderuar luftëtarët e rënë.
Në fjalimin e tij, Nasrallah tha se “të gjithë skenarët janë të hapur në frontin jugor të Libanit” dhe se “ajo që do të ndodhë atje do të varet nga ajo që do të ndodhë në Gaza”, duke i kërkuar Izraelit të ndalojë sulmet në Rripin e rrethuar, në mënyrë që të shmanget një luftë rajonale.
Nasrallah tha se sulmi i Hamasit në Izraelin jugor më 7 tetor ishte “100 për qind palestinez” dhe shprehu mbështetje për grupin palestinez, por nuk i shpalli një luftë të plotë Izraelit.
Udhëheqësi i Hezbollahut vlerësoi sulmin e Hamasit katër javë më parë, i cili kishte në shënjestër fshatra dhe pozicione ushtarake në jug të Izraelit.
Më shumë se 1,400 njerëz u vranë në Izrael në sulm, shumica prej tyre civilë, sipas autoriteteve izraelite.
Që atëherë, më shumë se 9,000 palestinezë janë vrarë në sulmin ajror dhe tokësor të ushtrisë izraelite në Gaza, shumica prej tyre gra dhe fëmijë.
“Ky operacion i madh, në shkallë të gjerë ishte vetëm rezultat i planifikimit dhe ekzekutimit palestinez,” tha Nasrallah, duke sugjeruar se Hezbollahu nuk ishte i përfshirë në sulm. “Fshehtësia e madhe e bëri operacionin shumë të suksesshëm”.
