Të dielën në katër komunat në veriun e vendit (Leposaviq, Zubin Potok, Zveçan dhe Mitrovicë e Veriut) është paraparë të mbahen zgjedhjet e jashtëzakonshme për kryetarë komunash.
Gazetari Branislav Krstiq si çështje kryesore e ka renditur sigurinë.
“Ata që e udhëheqin Listën Serbe dhe kreu i ‘Mbrojtjes civile’, kanë deklaruar se do të injorojnë këtë proces zgjedhor. Ky injorim na çel një pako të re, sepse nuk duhet me largu atë mundësinë për organizimin e disa grupeve ekstreme ose disa individë, të cilët nuk pajtohen me politikën zyrtare të Beogradit në Kosovë dhe me politikën e Listës Serbe”, tha ai, për “Kallxo Pernime”.
Krstiq ka shtuar se nëse do të merrnin pjesë në zgjedhje Lista Serbe dhe shoqëria civile, këto grupe ekstreme do ta kishin më të vështirë operimin.
Gazetari serb ka thënë gjithashtu që atmosfera në këto katër komuna veriore është mjaft e tensionuar.
“Jam i informuar që edhe ata që kanë aplikuar për zgjedhje, janë nën presion nga Beogradi, e çka vendosin ata, ne nuk e dimë. Beogradi zyrtar, kabineti i Vuçiqit do të insistojë që zgjedhjet mos me i bojkotu veç Lista Serbe por edhe komuniteti serb”, ka thënë më tej ai.
KQZ-ja ka akredituar rreth 360 vëzhgues për zgjedhjet e jashtëzakonshme për kryetarë të komunave Mitrovicë e Veriut, Zveçan, Leposaviq dhe Zubin Potok, si dhe për zgjedhjet e parakohshme për kuvendet e komunave Zveçan dhe Leposaviq.
Për zgjedhjet e së dielës do jenë 31 organizata vëzhguese me 357 vëzhgues.
Këto zgjedhje janë bojkotuar nga partia më e madhe e serbëve në Kosovë, Lista Serbe.
Lista Serbe ka njoftuar se nuk do të marrë pjesë në zgjedhje për shkak të “pasojave të dhunës së vazhdueshme institucionale”, të cilat “i zbaton regjimi i Albin Kurtit”.
Mitrovica e Veriut, Leposaviqi, Zveçani dhe Zubin Potoku kanë mbetur pa kryetarë që nga nëntori i vitit të kaluar, kur kryetarët e këtyre komunave që qeveriseshin nga Lista Serbe braktisën institucionet e Kosovës për shkak të vendimit të Qeverisë së Kosovës për targat e automjeteve, që nga autoritetet e Kosovës konsiderohen ilegale.
Këto zgjedhje u caktuan më 18 dhjetor 2022, mirëpo mbajtja e tyre ishte pamundësuar për shkak të përshkallëzimit të situatës më 10 dhjetor 2022, datë në të cilën u arrestua ish-polici Dejan Pantiq, nën dyshimet se kishte marrë pjesë në një sulm ndaj zyrtarëve të Komisionit Qendror të Zgjedhjeve në Mitrovicë të Veriut. /Kallxo.com/
