Me ftesë të homologut të saj zviceran, Ignazio Cassis, ministrja e Punëve të Jashtme, Donika Gërvalla ka udhëtuar për në Zvicër ku do të jetë pjesëmarrëse në Konferencën për Veprimin ndaj Minave në Ukrainë, e cila do të mbahet më 17 dhe 18 tetor, në Lozanë, transmeton KosovaPost.
Siç bëhet e ditur nga zyra për media e kryediplomates, kjo konferencë e bashkë-organizuar nga Zvicra dhe Ukraina, synon të mbledhë përfaqësues të nivelit të lartë nga qeveritë, organizatat ndërkombëtare dhe sektori privat për të diskutuar çështje kyçe të veprimit humanitar ndaj minave dhe ndikimin e tij në rimëkëmbjen sociale dhe ekonomike.
“Forca e Sigurisë së Kosovës (FSK) janë një shembull i shkëlqyer i profesionalizmit në çminimin e zonave të minuara, duke kontribuar jo vetëm në sigurinë kombëtare, por edhe në misionet ndërkombëtare. Pjesëmarrja e Kosovës në këtë konferencë thekson përkushtimin e vendit tonë për paqen dhe sigurinë globale”, thuhet në komunikatë.
