Trupi Gjykues në Dhomat e Specializuara të Kosovës ka marrë një vendim lidhur me komunikimet dhe vizitat e të paraburgosurve Hashim Thaçi, Kadri Veseli dhe Rexhep Selimi.
Në njoftimin e Gjykatës, thuhet se kushtet aktuale të paraburgimit janë të pamjaftueshme për të zvogëluar rrezikun që ata mund të ndërhyjnë në procedurë apo të paraqesin rrezik për sigurinë e dëshmitarëve.
“Më 1 dhjetor 2023, Trupi Gjykues në çështjen gjyqësore Thaçi dhe të tjerë, lëshoi vendimin e mëtejshëm lidhur me kërkesën e ZPS-së për ndryshimin e kushteve të paraburgimit të Thaçit, Veselit dhe Selimit. Sipas Trupit Gjykues, ZPS-ja konstatoi se kushtet aktuale të paraburgimit janë të pamjaftueshme për të zvogëluar rrezikun që tre të akuzuarit të mund të ndërhyjnë në procedurë dhe/ose të paraqesin rrezik për sigurinë e dëshmitarëve. Rrjedhimisht, Trupi Gjykues miratoi pjesërisht kërkesën dhe urdhëroi Administratoren që të zbatojë disa modifikime të kushteve të paraburgimit të tre të akuzuarve”, thuhet në komunikatën e lëshuar.
Sipas vendimit të panelit, i akuzuari nuk duhet të takohet me më shumë se një vizitor në çdo kohë, me përjashtim të vizitave nga bashkëshortët dhe fëmijët që mund të bëjnë vizita bashkërisht.
“Paneli konstaton se duhet të vendoset një sistem që fokusohet në identifikimin dhe përjashtimin e individëve që mund të paraqesin kërcënim për integritetin e procedurës apo që përfshihen në sjellje të papajtueshme me rregulloren. I akuzuari nuk duhet të takohet me më shumë se një vizitor në çdo kohë (me përjashtim të vizitave nga bashkëshortët dhe fëmijët që mund të bëjnë vizita bashkërisht. Të gjithë të paraburgosurit dhe vizitorët duhet të komunikojnë me zë dhe nuk lejohet komunikimi i fshehtë përmes pëshpëritjes apo përdorimi i ndonjë gjuhe të koduar”, thuhet në disa nga pikat e vendosura në vendimin e gjykatës”, thuhet tutje
Ky vendim thuhet se e zëvendëson vendimin e përkohshëm të Trupit Gjykues të datës 17 nëntor./
