Një avion mallrash i FedEx u detyrua të bënte një ulje emergjente në Aeroportin Ndërkombëtar të Newark Liberty në Nju Xhersei të shtunën në mëngjes, pasi zogjtë goditën një nga motorët, duke bërë që të marrë flakë në ajër.
Sipas zëdhënësit të Autoritetit Portual të Nju Jorkut dhe Nju Xhersit, Lenis Valens, zjarri mbeti i kufizuar te motori dhe nuk pati të lënduar. Në bord ndodheshin tre persona, të cilët u larguan të sigurt pas uljes.
Sipas regjistrimeve audio të LiveATC, ekuipazhi raportoi menjëherë goditjen nga zogu dhe kërkoi kthimin në aeroport. Ngjarja shkaktoi ndërprerje të përkohshme të trafikut ajror, por operacionet rifilluan shpejt. FedEx konfirmoi incidentin dhe vlerësoi profesionalizmin e pilotëve dhe ekipeve të emergjencës, shkruan A2 CNN.Administrata Federale e Aviacionit (FAA) dhe Bordi Kombëtar i Sigurisë së Transportit (NTSB) njoftuan se do të hetojnë rastin. Goditjet e zogjve janë një rrezik i njohur për aviacionin, me mbi 19 000 raste të raportuara në SHBA vetëm në vitin 2023, megjithëse rrallëherë shkaktojnë dëme të mëdha.
