Kartonin ia vlerësojnë vetëm 1 milionë euro, por që të gjithë gabojnë. Jasir Asani vërtet luan në Korenë e Jugut, veçse talenti është kudo I njëjtë, siç thuhet floriri mbetet flori kudo që të hidhet.
Specialiteti i tij, gjithnjë e më shumë, po spikat goli nga largësia, siç bëri edhe në Ligën e Kampionëve të Azisë.
Në radhët e ekipit nga Koreja e Jugut, Kuangju, Asani realizoi tri herë dhe shërbeu një asist, duke pasur edhe perlat e tij të zakonshme në repertor. Ishte një përsëritje sepse me rrjeta të tilla ndihmoi kombëtaren shqiptare që të kualifikohej për në fazën finale të Kampionatit Europian në Gjermani.
Kush I ka harruar goditjet e tij ndaj Polonisë, Çekisë dhe Moldavisë, në eliminatore në “Arenën Air Albania”. Po ashtu, me fanelën kuqezi shënoi edhe në miqësoren ndaj Lihtenshtajnit, një goditje dënimi perfekte.
Nuk duhet harruar se 29-vjeçari e ka pasur gjithmonë talentin dhe gjuajtjen nga distanca në gjak. Tek Partizani është dalluar disa herë me golat e veçantë, duke goditur disa nga kundërshtarët, e duke kulmuar edhe me titullin kampion në 2019.
