Gripi sezonal ka kaluar pragun epidemik, deklaron Instituti Kombëtar i Shëndetësisë Publike, i cili u bën thirrje qytetarëve që të vaksionohen.
Vetëm në Qendrën e Mjekësisë Familjare në Ulpianë, rreth 6 mijë qytetarë janë evidentuar me grip sezonal.
Tash e pesë ditë Rizah Halimi, po përballet me gripin sezonal, të cilin ai e përshkruan më të rëndë se COVID 19-të.
“4-5 ditë. As Covidi s’ka qenë kështu, më lehte e kom kalu. Kjo ma e vështirë. Edhe unë edhe gruja kështu jemi”, tha Halimi.
Me këtë grip sezonal janë shënuar rreth 6 mijë raste në Qendrën e Mjekësisë Familjare në Ulpianë. Doktoresha Nesrije Paqarada, deklaron se nga koha e festave ka pasur më shumë rritje të numrit të pacientëve.
“Nga 1 janari e deri sot më 24 janar vetem tek unë kanë qenë rreth 786 pacientë. E në total ne Qendren e Mjekësisë Familjare numër 5 në total kanë qenë 5800 raste”, ka thënë ajo për RTV21.
Përhapja e shpejtë e gripit sezonal dhe rritja e madhe e rasteve të dyshimta me këtë sëmundje ngjitëse, kanë bërë që të tejkalohet pragu epidemik, ka paralajmëruar Instituti Kombëtar i Shëndetësisë Publike të Kosovës.
Pragu epidemik është parametër që përcakton nëse një sëmundje ngjitëse mund të përhapet tek popullata. Ai përdoret për të vlerësuar rreziqet e mundshme të një epidemie dhe për të filluar me zbatimin e masave të duhura kontrolli.
Sipas institutit, në Kosovë pragu kalohet kur regjistrohen 5.000, apo më shumë raste me grip.
Instituti Kombëtar i Shëndetësisë Publike të Kosovës u bën thirrje qytetarëve që të vaksinohen kundër Gripit sezonal, ndërkohë që javën e fundit, sipas numrit të rasteve të raportuara, intensiteti i gripit është në aktivitetin e lartë të qarkullimit duke e kaluar pragun epidemik.
Instituti Kombëtar i Shëndetësisë Publike të Kosovës, deklaroi se Ministria e Shëndetësisë ka siguruar për këtë sezon 85,000 doza të vaksinës dhe qytetarët mund të vaksiohen në secilën komunë, në qendrën më të afërt të Mjekësisë familjare.
