Xhavit Haliti nga Partia Demokratike e Kosovës ka komentuar vizitën e presidentes dhe kryeministrit në ShBA, duke u shprehur se nëse dy krerët e shtetit priten në DASH, sipas tij është një sukses i tyre duke e cilësuar një hap drejt normalizimit të marrëdhënieve mes Kosovës e ShBA-së.
I ftuar në emisionin “Ditari” në Tëvë1, Haliti tha se interesi i ShBA-së është më i madh për të ndërtuar raportet me Serbinë se sa me Kosovën.
“Institucionet e Kosovës këtë rast presidentja, kryeministri dhe ministrja e jashtme në qoftëse priten në departamentin e shtetit unë mendoj që është një sukses i tyre, një hap të cilin po e qet Kosova edhe ShBA-të që të normalizojnë marrëdhëniet, që të krijohet një besueshmëri me njëri-tjetrin. Sa i përket shkuarjes në asamblenë e Kombeve të Bashkuara është një diçka të cilët janë të ftuar nga Organizata e Kombeve të Bashkuar, nuk janë të ftuar nga Uashingtoni. Interesi i ShBA-së është më i madh për të ndërtuar raportet me Serbinë se sa me Kosovën”, ka deklaruar Haliti.
Ndërsa, sa i përket formimit të Qeverisë, ish-deputeti thotë se Kurti ka frikë ta themelojë Qeverinë, për shkak të zbatimit të marrëveshjeve të nënshkruara mes Kosovës dhe Serbisë.
“Nuk besoj që ka qenë në pozicion më të keq Kosova, sidoqoftë nuk besoj që nuk besoj që egzistojnë mundësitë e tejkalimit të situatës e cila është dialogu. Ajo që po kërkohet nga Kurti është ta themelojë Qeverinë, kam përshtypje që Kurti ka frikë ta bëjë qeverinë edhe në qoftëse ka partner të gatshëm për të hyrë në koalicion, sepse ai e din saktë që delegacioni i cili ka qenë i planifikuar që të vijë në Kosovë për të filluar negociatat dhe dialogun strategjik me ShBA-të do të kërkojnë që të zbatohen marrëveshjet e nënshkruara mes Kosovës dhe Serbisë. Ky nuk është i gatshëm për shkak të qëndrimeve të tij të ashpra të cilat i ka pasur që të pranojë diçka të tillë”, ka theksuar Haliti.
