Grupi militant palestinez Hamas paralajmëroi të mërkurën se pengjet mund të vriten nëse Izraeli përpiqet t’i marrë me forcë dhe nëse sulmet ajrore vazhdojnë në Rripin e Gazës, transmeton Kosova Post.
Grupi tha në një deklaratë se “po bën gjithçka të mundshme për të mbajtur gjallë robërit e okupimit, por bombardimet e rastësishme sioniste (izraelite) po rrezikojnë jetën e tyre”.
Sa herë që okupuesit izraelit përpiqen të tërheqin robërit e tij me forcë, ata përfundojnë duke i sjellë në arkivole,” tha ai.
Izraeli rifilloi sulmet ajrore intensive në të gjithë Rripin e Gazës me popullsi të dendur javën e kaluar të ndjekur nga operacionet tokësore, duke shkatërruar qetësinë relative të ofruar nga një armëpushim në janar me Hamasin.
Që kur Izraeli rifilloi operacionet e tij ushtarake në Gaza, të paktën 830 palestinezë janë vrarë, sipas ministrisë së shëndetësisë palestineze.
Kryeministri Benjamin Netanyahu të mërkurën paralajmëroi Hamasin se Izraeli do të pushtonte territorin në Gaza nëse grupi refuzon të lirojë pengjet.
Nga 251 pengjet e kapur gjatë sulmit të Hamasit më 7 tetor 2023 që shkaktoi luftën, 58 mbahen ende në Gaza, duke përfshirë 34 që ushtria izraelite thotë se janë të vdekur.
“Sa më shumë që Hamasi të këmbëngulë në refuzimin e tij për të liruar pengjet tanë, aq më i fortë do të jetë presioni që ne do të ushtrojmë”, tha Netanyahu në parlament.
“Unë ua them këtë kolegëve të mi në Knesset, dhe ia them edhe Hamasit: Kjo përfshin kapjen e territoreve, së bashku me masat e tjera që nuk do t’i shtjelloj këtu.
Deklaratat e tij erdhën disa ditë pasi Ministri i Mbrojtjes, Israel Katz kërcënoi se do të aneksonte pjesë të Gazës nëse Hamasi nuk lironte pengjet e mbetura izraelite.
Në një deklaratë të premten, Katz tha: “Unë urdhërova (ushtrinë) të kapte më shumë territor në Gaza… Sa më shumë që Hamasi të refuzojë të lirojë pengjet, aq më shumë territor do të humbasë.”
Ofensiva ushtarake hakmarrëse e Izraelit ka vrarë të paktën 50,283 njerëz në Gaza, kryesisht civilë, sipas ministrisë së shëndetësisë palestineze.
Faza e parë e një armëpushimi që hyri në fuqi më 19 janar, bëri që Hamas të liroi 33 pengje izraelitë dhe me shtetësi të dyfishtë, duke përfshirë tetë të vdekur, dhe Izraeli liroi rreth 1,800 të burgosur palestinezë.
