Ekspozita “Gratë udhëheqëse në fokus” do të hapet më 3 dhjetor (e martë), 2024, nga ora 18:00, në Qendrën Barabar në Prishtinë. Ky është edicioni i dytë i ekspozitës.
Gratë në historinë e artit në shumësi i kemi parë të jenë muzat e një burri, qoftë ai piktor apo fotograf, skulptor apo regjisor. Ishte nuri i tyre ai që merrte vëmendjen, duke lënë shpesh në sfond virtytet dhe potencialin e tyre. Dhe jo vetëm grave artiste, por në përgjithësi grave që e ndryshuan historinë e botës, që i thyen barrierat për veten dhe për të tjerat, jo gjithëherë iu dha drita, hapësira dhe vëmëndja e merituar. Ashtu sikur edhe arti që gjithmonë e ka tendencën të zgjojë energji të reja, të ngrejë pyetje dhe të na çojë në horizonte të reja të komunikimit jashtë kornizës dhe të na frymëzojë, ashtu edhe lidershipi është një art në vete, që përmes vizionit për të ardhmen, duhet t’i frymëzojë të tjerët për ta ndarë pasionin e tyre në këtë rrugëtim të përbashkët.
Qëllimi i kësaj ekspozite është ta shtjellojë pozicionin e nuancuar të grave në Kosovë dhe t’i shpalosë, vlerësojë, njohë dhe çmojë kontributet e tyre të larmishme në aspekte të ndryshme të shoqërisë, duke shërbyer kështu edhe si burim frymëzimi për shumë gra të reja në Kosovë. “Gratë udhëheqëse në fokus – Edicioni i dytë” do t’i prezantojë edhe dhjetë gra dhe do të hapet gjatë fushatës “16 Ditët e aktivizmit kundër dhunës në baza gjinore”. Ekspozita dhe diskutimi në panel që e shoqëron atë synojnë të vazhdojnë t’i frymëzojnë të rinjtë dhe të rejat dhe t’i theksojnë kontributet e rëndësishme të grave në gjithë shoqërinë e Kosovës.
Fjalët e tyre frymëzuese do të rrjedhin në shiritin e verdhë të lidershipit, i cili karakterizohet nga stili inovativ, vlerat krijuese dhe të menduarit jashtë kornizës.
