Kryetarja e Kuvendit të Kosovës, Albulena Haxhiu, ka përkujtuar sot të rënët në Abri të Epërme dhe në Milloshevë, duke theksuar nevojën për drejtësi dhe ruajtjen e kujtesës historike për krimet e luftës, transmeton KosovaPost.
Në 27-vjetorin e ngjarjeve tragjike të 30 marsit 1999 në Abri të Epërme, Haxhiu nderoi viktimat e familjes Mulliqi, ku u vranë tetë persona, prej tyre katër fëmijë. Ajo theksoi se mungesa e ndjekjes penale dhe e dënimit për këto krime mbetet një nga boshllëqet më të mëdha të drejtësisë. Sipas saj, kjo plagë duhet kujtuar me respekt dhe mirënjohje të thellë për të gjithë të rënët për lirinë e vendit.
Ndërkohë, Haxhiu, së bashku me kryeministrin Albin Kurti dhe kryetarin e Komunës së Kastriotit, Halil Thaçi, mori pjesë edhe në ceremoninë përkujtimore për katër anëtarët e familjes Morina në Milloshevë. Aty u përkujtuan Fejzullah Morina dhe tre djemtë e tij, Lavdimi, Fidaimi dhe Shkëlzeni, të cilët u vranë gjatë luftës në Kosovë.
Kryetarja Haxhiu theksoi se për më shumë se një çerek shekulli dhimbja mbetet e gjallë, ndërsa drejtësia ende mungon, pavarësisht dëshmive për atë që ka ndodhur. Ajo shtoi se këto raste janë kujtesë e dhimbshme për faktin se një përqindje e madhe e viktimave të luftës në Kosovë ishin fëmijë.
Duke nënvizuar rëndësinë e kujtimit dhe nderimit të sakrificës së të rënëve, Haxhiu tha se institucionet kanë detyrim moral që të ruajnë kujtesën historike dhe të punojnë për një të ardhme më të drejtë, më paqësore dhe me dinjitet për të gjithë qytetarët.
