Ministri i Brendshëm Ervin Hoxha ka reaguar pas arrestimit të shefit të Antidrogës në Durrës, Gazmir Preçi, i cili akuzohet për “shpërdorim detyre” dhe “korrupsion pasiv” i personave që ushtrojnë funksione publike.
Hoxha deklaroi se arrestimi i Preçit është mesazh për çdo punonjës policie, i cilitdo nivel që hiqen si padronë të qytetarëve dhe bizneseve.
Hoxha paralajmëroi ndëshkim për këdo që cenon besimin e qytetarëve te policia.
“Operacioni i AMP-së, në bashkëpunim me SPAK, është mesazh i qartë për ata punonjës policie të cilitdo niveli qofshin, që do të tentojnë të cenojnë besimin e qytetarëve tek Policia, duke u hequr si padronë të qytetarëve dhe bizneseve, dhe jo si shërbëtorë të ligjit, do të marrin ndëshkimin më të ashpër ligjor.
Mbështes dhe inkurajoj AMP-në dhe agjencitë e tjera ligjzbatuese, si dhe nxis dhe garantoj qytetarët dhe bizneset të denoncojnë raste të tilla, sepse vetëm bashkërisht arrijmë të realizojmë objektivin madhor, për të pasur një Polici sa më profesionale dhe me integritet të lartë moral e ligjor”, shkruan ministri në rrjetin social Facebook.
Shefi i Sektori kundër Trafiqeve dhe Narkotikëve në Drejtorinë Vendore të Policisë Durrës, Gazmir Preçi u arrestua me urdhër të SPAK.
Mbi Preçin rëndojnë akuzat për “shpërdorim detyre” dhe “korrupsion pasiv” i personave që ushtrojnë funksione publike.
Arrestimi i tij u bë i mundur, pas hetimeve të zhvilluara ku si rezultat u siguruan prova dhe fakte që ky punonjës policie, duke shfrytëzuar funksionin organik, i ka kërkuar 20 mijë euro dhe marrë shumën prej 10 mijë euro në fazën e parë, nëpërmjet shantazhit për bllokimin e aktivitetit në biznes një shtetasi, posedues i një lokali në qytetin e Durrësit. RTSH
