Njëra ndër xhamitë më të vjetra në Ballkan në prag të rrënimit
Xhamia shekullore “Koxha Mehmet Bej”, është ndër xhamitë me minaret më të vjetra tënë Ballkan, në të cilën për më shumë se 100 vjet nuk është thirr Ezani. Në ditët e sotme është në gjendje të mjerueshme. Edhe pse mbrohet me ligj si monument i trashëgimisë kulturore, asgjë deri më sot nuk është bërë për restaurimin e saj.”, njofton Kosova Post.
Sipas tipareve stilistike dhe mënyrës së ndërtimit, objekti është ndërtuar në të ashtuquajturën periudha klasike e ndërtimit osman nga fundi i XVI dhe fillimi i shekullit XVII.
Dihet, sipas vakëfnameit të Koxha Sinan-Pasha, se ndër pronat e tjera përmendet prona në fshatin Tabanovce dhe se u formua një fermë e cila përbëhej nga një shtëpizë dhe dy mullinj pranë një lumi.
Xhamia shekullore “Koxha Mehmet Bej”, gjendet në fshatin Tabanoc, vetëm pak metra nga pikë-kalimi kufitar me Serbinë. Edhe pse është përskaj autostradës, aktualisht nuk ka rrugë që të shpie në oborrin e saj.
Bujqit e zonës kanë lëvruar tokën deri në themelet e xhamisë, duke rrezikuar qëndrueshmërinë dhe reliktet e vjetra të saj. Që nga viti 2008, ajo është edhe në mbrojtje të ligjit si monument i trashëgimisë kulturore. Sipas të dhënave të Muzeut Arkeologjik të Maqedonisë, kjo është njëra nga 38 objektet fetare të mbrojtura me ligj në të gjithë vendin. Andaj, nga Qendra Nacionale për Konservim, është duke u përgatitur projekti për restaurimin e saj.
Xhamia është në administrim të Bashkësisë Islame përkatësisht Myftinia e Kumanovës, të cilët ata thonë se duhet të rikthehet në pronësi parcela që i takon xhamisë.
