Në një atmosferë të ngrohtë dhe festive, sot në ambientet e Rektoratit të Universitetit të Shkencave të Aplikuara në Ferizaj, u shënua ngjarja kombëtare për të nderuar datat historike të rëndësishme të kombit shqiptar.
Ngjarja u organizua për nder të festave të Nëntorit: Ditën e Flamurit të Kombit Shqiptar, Shpalljen e Pavarësisë së Shqipërisë, Daljen Publike të Ushtrisë Çlirimtare të Kosovës dhe Ditëlindjen e Komandantit Legjendar Adem Jashari.
Rektori i Universitetit të Shkencave të Aplikuara në Ferizaj Prof.Dr.Agron Bajraktari, në fjalën e tij hyrëse, shpalosi një kronologji të ngjarjeve që kanë lënë gjurmë të thellë në historinë tonë. Duke filluar nga lufta e Skënderbeut dhe deri te lufta e fundit në Kosovë, rektori paraqiti me pasion kthesat kryesore të rrugës së lirisë dhe pavarësisë.
Dy sallat e reja të promovuara gjatë kësaj ngjarjeje, të quajtura “Komandanti Legjendar” dhe “Kalorësi i Lirisë” u shndërruan në hapësira që do të shpalosin kujtimet dhe lavdimin e atyre që kontribuuan në përcaktimin e identiteti shqiptar dhe rrugën drejt lirisë.
Fjalët e tjera nga stafi akademik i universitetit përshkuan përvojën dhe angazhimin e tyre personal në luftën e fundit në Kosovë. Nëpërmjet narrativave të tyre të ndjera dhe emocionuese, ata ndanë me të pranishmit vlerat dhe frymën e solidaritetit, që gjithmonë ka udhëhequr shqiptarët në momente kritike të historisë së tyre.
Kjo ngjarje, e cila tani është një traditë vjetore e Universitetit, synon të ruaj kujtesën dhe respektin ndaj ngjarjeve që kanë formuar dhe forcuar identitetin tonë kombëtar.
Rektori i Universitetit, Prof. Dr. Agron Bajraktari, i uron të gjithëve festat e Nëntorit!
Murali në sallën “Komandanti Legjendar” u piktorua nga studentët e Fakultetit të Arteve të Aplikuara në Ferizaj dhe udhëhequr nga profesoresha Lebibe Topalli.
1. Elba Gashi
2. Valmira Sylejmani
3. Hanë Haziri
4. Ardit Kurtaliqi
5. Antikë Curroja.
Ndërsa murali në sallën “Kalorësi i Lirisë” gjithashtu u piktorua nga profesoresha Lebibe Topalli.
Fotografitë janë realizuar nga studenti Dren Osmani.
Linku i videos: Video e realizimit të muralit
