Shkencëtarët kanë zbuluar se personat që kanë probleme me gjumin mund të kenë më shumë gjasa të pësojnë goditje në tru, transmeton Kosova Post.
Studimi i publikuar në revistën mjekësore “Neurology” u fokusua në lidhjen mes problemeve të gjumit dhe rrezikut të goditjes në tru përmes vlerësimeve të ndryshme.
Sipas lajmit në ueb sajtin Mint, në një studim ndërkombëtar të një grupi shkencëtarësh nga Universiteti Galway në Irlandë janë përfshirë 2.243 persona që kanë pasur goditje në tru dhe 2.253 persona që nuk kanë pasur goditje në tru.
Pjesëmarrësit, mosha mesatare e të cilëve ishte 62, u pyetën për mënyrën e gjumit, sa orë kanë fjetur, cilësinë e gjumit, përgjumjen, gërhitjen, frymëmarrjen e hundës dhe frymëmarrjen gjatë gjumit.
Gjumi i tepërt ose i pakët, dremitjet e gjata, gjumi me cilësi të dobët, gërhitja, nuhatja dhe apnea e gjumit u identifikuan si probleme me gjumin dhe personat me pesë ose më shumë nga këto simptoma kishin rrezik më të lartë për goditje në tru.
– Fjetja e tepër ose e pakët e rrit rrezikun
Në studim, njerëzit që flinin shumë ose shumë pak kishin më shumë gjasa të pësonin një goditje sesa njerëzit që flinin për një kohë mesatare.
Theksohet se njerëzit që flenë më pak se 5 orë në ditë kanë 3 herë më shumë gjasa të pësojnë goditje në tru sesa ata që flenë mesatarisht 7 orë. Personat që flinin më shumë se 9 orë kishin më shumë se dy herë gjasa të pësonin goditje se sa ata që flinin 7 orë.
Ata që dremisin për më shumë se një orë kishin 88 për qind më shumë gjasa të pësonin goditje se sa ata që nuk e bënin.
Gjithashtu u analizuan probleme të tilla si gërhitja gjatë gjumit, frymëmarrja nazale dhe apnea e gjumit.
U zbulua se njerëzit me apnea të gjumit kishin rreth tre herë më shumë gjasa për të pasur një goditje se sa ata që nuk kishin apnea.
Studimi thekson se problemet me gjumin nuk shkaktojnë goditje direkte, por thjesht ndërlidhen dhe shërbejnë si tregues./aa
