Human Rights Watch akuzoi të enjten se një sulm ajror izraelit ndaj një burgu famëkeq iranian ishte “krim lufte”, duke e akuzuar gjithashtu Teheranin për dëmtimin dhe zhdukjen e të burgosurve pas sulmit.
Më 23 qershor Izraeli goditi burgun ‘Evin’ në Teheran, një nga qendrat më famëkeqe të paraburgimit për aktivistë politikë dhe disidentë, gjatë luftës 12-ditore me Republikën Islamike.
Sulmet, që ndodhën gjatë orëve të vizitës, goditën hyrjen kryesore jugore të burgut ‘Evin’, një hyrje tjetër veriore dhe zona të tjera të kompleksit, duke shkatërruar ndërtesa ku ndodheshin ambiente mjekësore dhe pavione të burgut.
Autoritetet iraniane fillimisht thanë se të paktën 71 persona u vranë gjatë sulmit ajror, mes tyre civilë, përfshirë të burgosur, familjarë vizitorë dhe staf të burgut. Më pas mediat iraniane e rritën shifrën në 80. Nuk ishte e qartë pse Izraeli e kishte shënjestruar burgun, raporton AP.
Human Rights Watch tha se sulmi ishte “i paligjshëm” dhe se nuk kishte prova për ndonjë paralajmërim paraprak ose objektiv ushtarak para goditjes së kompleksit të burgut, i cili vlerësohet se mban mbi 1.500 të burgosur.
“Për ta bërë situatën edhe më të rëndë, forcat izraelite vunë në rrezik të madh të burgosurit që ishin tashmë viktima të shtypjes brutale të autoriteteve iraniane”, tha Michael Page, zëvendësdrejtor për Lindjen e Mesme në këtë organizatë të të drejtave të njeriut.
