Mbrojtësi qendror (i përdorur gjithashtu si mesfushor) i Barcelonës, që nga data 24 gusht nuk është në dispozicion për shkak të një problemi me tendinën e Akilit të këmbës së majtë, problem që e detyroi të kryente një operacion së fundmi, ka dhënë një intervistë për “TV 2 Sport” për të treguar momentin që po përjeton:
“Jam rikthyer në fushë dhe ky është hapi i parë. Tani duhet të ndihem më mirë, shoh që më në fund jemi në rrugën e duhur.”
28-vjeçari danez shtoi:
“Nuk e mbaj mend fare herën e fundit kur kam luajtur pa dhimbje! Do të thosha se jam ndier shumë mirë vetëm në sezonin tim të parë te Barcelona, pra në vitin 2022/23.
Jam i zemëruar me veten: ndoshta duhet ta kisha dëgjuar trupin tim më parë dhe të operohesha më herët, por nga ana tjetër, ne gjithmonë duam të luajmë. Kam mësuar që duhet të kujdesesh për trupin kur ai ka nevojë dhe duhet ta kisha bërë këtë që në sezonin e kaluar. Mendoj se të gjithë e dinë që kam luajtur me dhimbje për një farë kohe.”
Sa i përket Barcelonës së re të Hansi Flick, ish-lojtari i Chelseat deklaroi:
“Jam i lumtur për skuadrën sepse po fiton, por natyrisht, do të doja të isha pjesë e saj. I shikoj nga shtëpia ndërsa do të doja vetëm të isha në fushë, prandaj është e vështirë. Ditët janë më të gjata sepse nuk po bëj atë që vërtet dua të bëj.”
Christensen pritet të rikthehet në fushë në janar.s.n.
