Lewis Hamilton, shtatë herë kampion i Formula 1, reagoi ashpër ndaj vdekjeve të fëmijëve të shkaktuara nga uria dhe kequshqyerja pas bllokadës disamujore izraelite ndaj Gazës dhe sulmeve çnjerëzore ndaj qendrave të shpërndarjes së ndihmave. “Nuk mund të qëndrojmë më të heshtur,” tha ai.
Në një postim në rrjetet sociale përpara garës së fundjavës në Belgjikë, Hamilton shpërndau një postim të UNICEF-it që theksonte:
“Raportet tregojnë se mbi 100 fëmijë janë vrarë nga sulmet e intensifikuara në Gaza gjatë javës së parë të korrikut. Vrasjet e fëmijëve kanë vazhduar çdo ditë që atëherë. Armëpushim tani.”
“Nuk mund të qëndrojmë më të heshtur,” theksoi Hamilton në postimin e tij.
Vdekjet nga uria dhe kequshqyerja, veçanërisht tek fëmijët, po rriten për shkak të bllokadës ndaj Gazës dhe sulmeve izraelite.
Ministria palestineze e Shëndetësisë njoftoi të premten se numri i palestinezëve që kanë vdekur nga uria dhe kequshqyerja gjatë sulmeve të vazhdueshme izraelite ndaj Gazës, të nisura më 7 tetor 2023, ka kaluar shifrën 120, përfshirë 83 fëmijë.
Duke refuzuar thirrjet ndërkombëtare për armëpushim, ushtria izraelite ka vazhduar ofensivën brutale në Gaza, duke vrarë mbi 59.600 palestinezë, shumica gra dhe fëmijë. Bombardimet e pandërprera kanë shkatërruar enklavën dhe kanë çuar në mungesë të thellë ushqimi.
