Ish-ministri i Mbrojtjes i Izraelit, Moshe Yaalon, ka akuzuar qeverinë izraelite për kryerjen e krimeve të luftës dhe pastrim etnik në Rripin e Gazës.
Yaalon, një ish-gjeneral dhe kritik i ashpër i kryeministrit Benjamin Netanyahu, ka paralajmëruar se qeveria po përpiqet të dëbojë palestinezët nga veriu i Gazës dhe të rivendosë vendbanime hebreje atje, duke e cilësuar këtë një akt të pastrimit etnik.
Në një intervistë për transmetuesin publik izraelit Kan, Yaalon tha se situata në Gaza po mbulohet dhe se “krime lufte po kryhen.”
Ai shtoi se shumë nga veprimet e qeverisë izraelite janë të papranueshme dhe se duhet të ndërmerren masa për t’i parandaluar ato, raporton Reuters, transmeton Klankosova.tv.
Yaalon, i cili ka shërbyer si ministër i Mbrojtjes nga viti 2013 deri në 2016, është një kritik i njohur i qeverisë Netanyahu, e cila e ka akuzuar për “shpifje”.
Këto akuza vijnë pas lëshimit të urdhër-arrestimeve nga Gjykata Ndërkombëtare Penale për kryeministrin Netanyahu dhe ish-ministrin e Mbrojtjes, Yoav Gallant, për krime lufte dhe krime kundër njerëzimit gjatë konfliktit në Gaza.
Netanyahu dhe Gallant i kanë refuzuar akuzat, ndërsa ministri i Jashtëm izraelit, Gideon Sa’ar, e quajti akuzën e Yaalon të pasaktë dhe të dëmshme, duke shtuar se veprimet e Izraelit janë në përputhje me ligjin ndërkombëtar.
Në një intervistë tjetër, Yaalon ka paralajmëruar se Izraeli është në një pikë kyçe, ku qeveria synon “të pushtojë, të aneksojë dhe të kryejë pastrim etnik”, duke shkaktuar shqetësim për ndikimin e këtyre politikave mbi imazhin dhe të ardhmen e Izraelit.
