Një ish-futbollist i Premier League është emëruar president i Gjeorgjisë në mes të tensioneve në rritje për marrëdhëniet e vendit me Rusinë. Mikheil Kavelashvili, 53 vjeç, i cili ka luajtur si sulmues për Manchester City midis viteve 1996 dhe 1997, dhe më pas për disa klube në Superligën Zvicerane, u zgjodh president pas një votimi në parlament.
Kavelashvili u bë anëtar i parlamentit në vitin 2016 dhe në vitin 2022, bashkëthemeloi lëvizjen politike Pushteti Popullor, e cila ka pasur lidhje me partinë në pushtet, Ëndrra Gjeorgjiane. Lëvizja është e njohur për retorikën e saj të fortë të së djathtës ekstreme dhe antiperëndimore.
Për opozitën, emërimi i Kavelashvili është një goditje për aspiratat e Gjeorgjisë për t’u bashkuar me Bashkimin Evropian dhe një fitore për influencën e Rusisë në rajon.
Kujtojmë se partia në pushtet, Ëndrra Gjeorgjiane mori nën kontroll Parlamentin në zgjedhjet e fundit. Opozita e akuzoi atë për manipulim të votave me ndihmën e Rusisë fqinje, që sipas saj synonte të mbante në pushtet një subjekt miqësor me Moskën.
Por protestat kundër zgjedhjeve morën përmasa të reja pasi partia në pushtet vendosi në fund të nëntorit të pezullojë procesin e anëtarësimit në BE deri në 2028-n.
Ky vendim ishte një përgjigje ndaj rezolutës së Parlamentit Evropian që i etiketonte zgjedhjet as të lira e as të ndershme, shkruan euronews.al.Vëzhguesit ndërkombëtarë thonë se gjatë procesit konstatuan akte dhune, korrupsion dhe votim të dyfishtë, duke detyruar Brukselin të kërkojë përsëritjen.
