Qindra policë izraelitë u angazhuan të enjten në portin jugor të Ashdodit për të procedurat rreth 450 aktivistë ndërkombëtarë të ndaluar nga forcat detare izraelite disa orë më herët në Detin Mesdhe, njoftojnë autoritetet izraelite.
Aktivistët, mes tyre edhe ligjvënës evropianë, po merrnin pjesë në një flotilje që synonte të thyente bllokadën izraelite të Gazës, kur anijet e tyre u ndaluan, duke nxitur dënime të gjera dhe protesta në mbarë botën.
‘Global Sumud Flotilla’ ishte më e madhja deri tani që tentoi të thyejë bllokadën dhe erdhi në një kohë të kritikave gjithnjë e më të ashpra për veprimet e Izraelit në Gaza, ku ofensiva e tij ka shkatërruar zona të tëra dhe ka vrarë dhjetëra mijëra njerëz, raporton AP.
Aktivistët kishin shpresuar se numri i madh i anijeve do ta bënte më të vështirën për autoritetet izraelite që t’i ndalonin të gjitha, por Ministria e Jashtme e Izraelit shpalli të përfunduar operacionin të enjten pasdite.
Policia izraelite publikoi një video që tregonte rreth 600 oficerë duke punuar gjatë festës hebraike të Yom Kippur, e konsideruar më e shenjta në kalendarin hebraik, për të regjistruar aktivistët e ndaluar para deportimit të tyre.
Mijëra mbështetës të flotiljes dolën nëpër rrugë në disa qytete të mëdha pasi u publikua lajmi për ndalimin e saj, për të dënuar operacionin izraelit dhe ofensivën në Rripin e Gazës. Unioni më i madh i sindikatave të Italisë shpalli një grevë të përgjithshme njëditore për të premten.
Ndërsa shumica e marshimeve ishin paqësore, përplasje shpërthyen mes policisë dhe protestuesve pro-palestinezë në Paris dhe Barcelonë, Spanjë.
Flotilja, e cila filloi me mbi 40 anije dhe rreth 450 aktivistë, mbante një sasi simbolike ndihme humanitare për Gazën. Qëllimi kryesor i saj, thanë organizatorët, mbeti “të thyejë rrethimin e paligjshëm të Izraelit dhe t’i japë fund gjenocidit ndaj popullit palestinez”.
Ministria e Jashtme e Izraelit për flotiljen vlerësoi si një “provokim”, duke thënë se vende të ndryshme kanë ofruar të dërgojnë ndihmën që mbartnin anijet.
Izraeli është nën kritika të ashpra për sasinë e ndihmës që lejon të hyjë në Gaza dhe mënyrën se si shpërndahen mallrat. Ai ka mohuar fuqishëm se po kryen gjenocid.
Kryeministri izraelit, Benjamin Netanyahu, përgëzoi marinën dhe ushtarët e vendit të tij për ndalimin e flotiljes në kohën e festës ‘Yom Kippur’, duke thënë në një deklaratë se “veprimi i tyre i rëndësishëm parandaloi dhjetëra anije të hynin në zonën e luftës dhe zmbrapsi një fushatë delegjitimimi kundër Izraelit.”
Organizatorët e flotiljes thanë se të paktën 41 nga anijet e tyre u ndaluan ose supozohet se u ndaluan gjatë operacionit të gjatë natës së të së enjtes. Autoritetet izraelite thanë më vonë se vetëm një anije kishte mbetur “në distancë” dhe do të ndalohej nëse afrohej.
