Një sulm masiv izraelit ka rrafshuar një ndërtesë banimi në qendër të kryeqytetit libanez Bejrut.
Sipas mediave të huaja, të paktën 11 persona janë vrarë dhe më shumë se 60 janë plagosur, sipas Ministrisë së Shëndetësisë të Libanit.
Ndërtesa tetë-katëshe u shkatërrua plotësisht pa paralajmërim nga pesë raketa në lagjen Basta me popullsi të dendur të kryeqytetit, sipas Agjencisë Kombëtare të Lajmeve të Libanit (NNA).
Shpërthimet tronditën qytetin pas sulmit izraelit, i cili ndodhi rreth orës 04:00 me kohën lokale të shtunën.
Ushtria izraelite nuk bëri asnjë koment të menjëhershëm për sulmin në Basta, shkruan A2 CNN.
Shkalla e sulmit ajror të së shtunës dhe fakti që ndodhi pa paralajmërim tregojnë se një figurë e lartë e Hezbollahut mund të ketë qenë objektivi, megjithëse nuk ka pasur asnjë konfirmim as nga grupi i armatosur dhe as nga ushtria izraelite.
Ekipet e urgjencës kontrolluan vendin në Basta, ku shtëllungat e tymit u ngritën nga një krater i madh.
Numri i të vdekurve ka të ngjarë të rritet ndërsa puna për heqjen e rrënojave në vend vazhdon. Ministria e Shëndetësisë tha se testet e ADN-së do të përdoren për të identifikuar viktimat.
Banori vendas, Nemir Zarariya tha se ai dhe familja e tij ishin në gjumë kur filloi sulmi para agimit.
“Ne ishim në gjumë të thellë dhe më pas ndodhi sulmi dhe më pas një goditje e dytë. Ne nuk e kuptuam se çfarë ndodhi,” tha ai, shkruan A2CNN.“Ishte pluhur dhe shtëpi të shkatërruara, njerëz që vraponin dhe bërtisnin. Gruaja ime është në spital, vajza ime në spital, tezja ime është në spital”, shtoi ai më tej.
