Studimet e shumta kanë treguar se kafeja dhe konsumimi i lartë i kafeinës mund të kenë efekte negative në trup dhe madje të ndikojnë në humorin e individëve.
Për të vëzhguar këto efekte, gazetari Valentin Biret vendosi të ndalonte kafen për 30 ditë, duke monitoruar ndryshimet që ndodhnin në trupin e tij, si dhe efektet pozitive dhe negative që mund të vinin nga ky ndryshim. Ai kishte konsumuar 4-5 kafe çdo ditë për 24 vitet e fundit dhe ndjeu se ky zakon kishte filluar të ndikonte në cilësinë e gjumit të tij.
Biret, i cili kishte lënë cigaren gjatë pandemisë Covid-19, vendosi që tani të bëjë një tjetër ndryshim të madh në stilin e tij të jetesës.
Për të ndihmuar në këtë proces, ai kërkoi mbështetje nga dietologia Alexandra Murcier, e cila bëri një bilanc të konsumit të kafes së tij dhe i shpjegoi se për shumicën e njerëzve, konsumimi i 3-4 kafeve në ditë mund të ketë efekte pozitive, duke përfshirë përfitime për sistemin kardiovaskular dhe uljen e rrezikut të sëmundjes së Parkinsonit. Megjithatë, për ata që janë të ndjeshëm ndaj kafeinës ose që janë ‘të varur’ nga kafeja, konsumimi i saj mund të shkaktojë shqetësime të gjumit dhe të rrisë nivelin e nervozizmit.
Murcier shpjegoi gjithashtu se ndalimi i kafes mund të sjellë disa përfitime, si përmirësimin e cilësisë së gjumit dhe uljen e takikardisë, një shqetësim i zakonshëm i shkaktuar nga kafeina. Ajo e theksoi gjithashtu se një nga efektet anësore të kafes është se mund të irritojë stomakun dhe të shkaktojë urth, ndaj ndalimi i saj mund të sjellë një ulje të këtyre shqetësimeve.
Një tjetër aspekt që Murcier e përmendi është cikli vicioz i energjisë që krijohet nga konsumimi i kafes.
Pasi një filxhan kafeje rrit energjinë për një periudhë të shkurtër, shpesh pas tij vjen një rënie e energjisë, duke e bërë individin më të lodhur dhe të dëshiruar për më shumë kafe, duke krijuar kështu një rreth të mbyllur.
Ky cikël mund të ndikojë në cilësinë e gjumit dhe të shkaktojë lodhje të vazhdueshme.
Në fund, Biret vuri re se, pas 30 ditësh pa kafe, ai ndjeu një përmirësim në gjumë dhe shëndet, duke treguar se ndalimi i kafes mund të ketë efekte të dobishme për ata që vuajnë nga çrregullimet e gjumit dhe shqetësimet e stomakut. Syri.net-bovary.gr.
