Shënoi golin e vetëm të Kosovës në fitoren ndaj Lituanisë, por e la skuadrën në ‘baltë’ me kartonin e kuq të marrë në fundin e pjesës së parë. Por ky episod nuk mund t’ia prishte festën Muharrem Jasharit, që u shfaq shumë i lumtur në prononcimin pas ndeshjes.
“Ndoshta kam menduar se nuk është as karton i verdhë. E kam prekur pak në këmbë, por për mua nuk ishte karton i kuq. Kemi luajtur shumë mirë taktikisht. E kemi analizuar kundërshtarin. Nuk është pozita ime e zakonshme, kjo në krahun e majtë, por e kam luajtur edhe më parë. E falënderoj trajnerin që më ka dhënë besimin”, deklaroi fillimisht Jashari.
Më tej, Jashari ka treguar se ka luajtur në krahun e majtë te Trepça ’89 dhe pak te Drita dhe e njeh atë pozicion.
“I gjithë rrugëtimi nuk ishte i lehtë. Jam shumë i lumtur me gjithë lojtarët, me gjithë stafin, për këto katër ndeshje që isha i grumbulluar. Golin ia dedikoj familjes sime”, deklaroi Jashari
