Kancelari gjerman, Olaf Scholz, i ka bërë thirrje Izraelit të tregojë përmbajtje dhe të shmanget nga një reagim i njëanshëm ndaj Iranit, transmeton Anadolu.
Duke folur me gazetarët në Bruksel në fund të një samiti dy-ditor të Bashkimit Evropian (BE), Scholz tha se liderët evropianë dënuan fuqishëm sulmin e Iranit kundër Izraelit dhe ata shprehën shqetësimet e tyre për një përshkallëzim të mundshëm në rajon.
“Është shumë mirë që Izraeli ka arritur të mbrohet me sukses nga ky sulm. Nga këndvështrimi im dhe i shumë liderëve të tjerë që kanë komentuar këtu, është e rëndësishme që Izraeli të mos rrezikojë tani këtë mbështetje dhe këtë sukses”, tha Scholz.
“Të gjitha palët duhet të ushtrojnë përmbajtje për të shmangur një zjarr dhe kjo është gjithashtu diçka për të cilën ramë dakord këtu në Bruksel”, shtoi ai, duke iu referuar diskutimeve midis krerëve të vendeve dhe qeverive të BE-së.
Komentet e tij erdhën mes tensioneve të rritura në rajon, pasi kryeministri izraelit, Benjamin Netanyahu, tha se “Izraeli do të marrë vendimet e tij dhe do të bëjë gjithçka që është e nevojshme”, pavarësisht thirrjeve ndërkombëtare për përmbajtje dhe de-përshkallëzim.
Teherani kreu një sulm gjatë natës të së shtunës në përgjigje të një sulmi të 1 prillit në konsullatën iraniane në Siri që vrau shtatë oficerë ushtarak iranianë, duke përfshirë dy komandantë të nivelit të lartë.
Thuhet se Irani të shtunën lëshoi mbi 300 drone dhe raketa, me pothuajse të gjitha të kapura nga sistemet e mbrojtjes ajrore të Izraelit dhe aleatëve të tij, SHBA-së, Francës dhe Mbretërisë së Bashkuar.
