Në Kongresin e demokratëve që po zhvillohet në Çikago, e gjithë vëmendja e të pranishmëve në natën e fundit ishte te Tim Walz, i cili dhe zyrtarisht pranoi nominimin e Kamala Harris për të qenë zëvendëspresident nëse ajo fiton në zgjedhjet e nëntorit.
Dukshëm i emocionuar, guvernatori i Minesotës tha përpara demokratëve se ai ishte në një ekip fitues që shumë shpejt do të arrijë qëllimin. Walz shprehu mbështetjen për Harris dhe shtoi se ajo është gati që ta udhëheqë Amerikën.
Por edhe Oprah Winfrey ishte ndër protagonistet e mbrëmjes së Walz . Mbretëresha e ekranit u ngjit në skenë, për të marrë anën e Kamala Harris. Duke pranuar se ajo ishte regjistruar për të votuar si e pavarur, Winfrey, në fjalimin e saj të parë në një konventë sulmoi republikanët: “Ata duan të na trembin, duan të na qeverisin, na bëjnë të besojmë se librat janë të rrezikshëm dhe se pushkët janë të sigurta, se ka një mënyrë të drejtë për të adhuruar dhe një mënyrë të gabuar për të dashuruar, njerëz që përpiqen së pari të përçajnë dhe më pas të pushtojnë”.
Ndër pikat kryesore të mbrëmjes ishin shfaqja e imazheve të sulmit në Kapitol nga mbështetësit e Trump dhe apeli i Jon Polin dhe Rachel Goldberg , prindërve të Hersh Goldberg-Polin, të rrëmbyer nga Hamasi më 7 tetor gjatë festivalit Nova, shkruan A2CNN.“Lirimi i pengjeve nuk është politik, është një çështje humanitare”, tha babai i pengut, duke falënderuar Joe Biden dhe Kamala Harris për punën e tyre për armëpushimin në Gaza.
