Ndërrimi i kristalinit nuk është vetëm një zgjidhje për problemin e kataraktës, por sot kjo teknikë mund të përdoret edhe për të korrigjuar çrregullime të tjera të shikimit.
Dr. Tommaso Nuzzo, kirurg okulist i specializuar në kirurgjinë e retinës, kataraktës dhe kirurgjinë refraktive në Policlinico di Milano ka folur lidhur me këtë.
“Së pari, ndryshimi kryesor mes këtyre ndërhyrjeve është tipi i kristalinit të implantuar,” shpjegon Dr. Nuzzo. Edhe pse teknika bazë është e njëjtë—heqja e kristalinit natyror dhe zëvendësimi i tij me një lente artificiale (IOL – Intraocular Lens)—qëllimet dhe indikacionet për secilin rast ndryshojnë ndjeshëm.
Çfarë është katarakta?
Katarakta është një gjendje ku kristalini natyror i syrit bëhet i turbullt, duke penguar dritën të arrijë në retinë dhe duke shkaktuar shikim të paqartë. Kjo gjendje zakonisht lidhet me plakjen, por mund të ndikohet edhe nga faktorë gjenetikë, trauma, medikamente apo sëmundje metabolike.
Ndërhyrja për heqjen e kataraktës përfshin zëvendësimin e kristalinit të dëmtuar me një lente intraokulare artificiale për të rikthyer qartësinë e shikimit.
Si kryhet ndërrimi i kristalinit?
“Ndërhyrja kryhet zakonisht me anestezi topike (me pika anestetike) dhe zgjat rreth 10 minuta,” thotë Dr. Nuzzo. “Pacienti ndjen vetëm një ndjesi të lehtë të ujit në sy dhe asnjë dhimbje.”
Procedura kryesore përfshin:
✔️ Fraksionimin dhe aspirimin e kristalinit natyror përmes ultrazërit (fakoemulsifikimi)
✔️ Implantimin e një lenteje artificiale për të zëvendësuar kristalinin e hequr
Kjo është një ndërhyrje mikro-kirurgjikale, që realizohet përmes prerjeve shumë të vogla në korné, pa nevojë për qepje.
Llojet e Kristalinëve Artificiale
Dr. Nuzzo shpjegon se ekzistojnë tre lloje kryesore të kristalinëve:
-Monofokal (standard) – korrigjon shikimin për distanca të largëta
-Monofokal Plus & EDOF – përmirëson shikimin për larg dhe për distanca ndërmjetme (p.sh., për të parë ekranin e makinës ose kompjuterin)
– Trifokal – korrigjon shikimin për të gjitha distancat (larg, afër dhe ndërmjet)
Zgjedhja e llojit të kristalinit bëhet pas një vizite të detajuar okulistike dhe vlerësimit të nevojave të pacientit.
Cilat janë përfitimet e ndërrimit të kristalinit?
-Përmirësim i menjëhershëm i shikimit dhe eliminim i defekteve refraktive
-Parandalim i ndërhyrjes për kataraktë në të ardhmen
-Rikthim i shikimit të qartë më herët dhe për një kohë më të gjatë
A ka rreziqe apo komplikacione?
Megjithëse rrallë, komplikacionet përfshijnë:
-Infeksion post-kirurgjikal (shumë i rrallë, por serioz)
-Thyerja e kapsulës së kristalinit – një komplikacion më i zakonshëm, por i trajtueshëm me ndërhyrje të menjëhershme.
Nëse reagimi është i shpejtë, shikimi mund të rikuperohet plotësisht, por me një kohë shërimi pak më të gjatë.
Kur duhet të kryhet ndërrimi i kristalinit?
– Për kataraktë – kur pacienti ka humbje të ndjeshme të shikimit për shkak të turbullimit të kristalinit.
-Për korrigjimin e shikimit – si një alternativë për të mos përdorur më syze ose lente kontakti, zakonisht mbi moshën 45 vjeç.
A është i përshtatshëm për të gjithë?
“Ndërhyrja është e përshtatshme për shumicën e pacientëve, por duhet të merret parasysh mosha dhe gjendja shëndetësore,” thekson Dr. Nuzzo.
Sa kohë zgjat rikuperimi?
– 2-3 ditë për rikthim të pjesshëm të shikimit
– 1 javë pa kontakt me ujin ose prekjen e syve
– Kthimi në aktivitete normale mund të ndodhë shpejt, duke shmangur vetëm aktivitetet me sforcim të lartë fizik për disa javë.
Cila është mosha më e mirë për ndërhyrjen?
-Për korrigjim të shikimit – mbi 45 vjeç
– Për kataraktë – në çdo moshë, sapo shfaqen simptoma të ndjeshme. Living.al
Kjo ndërhyrje jo vetëm që rikthen shikimin, por gjithashtu mund të përmirësojë ndjeshëm cilësinë e jetës suaj!
