Prokuroria Themelore në Prizren ka njoftuar se ka kërkuar nga Gjykata Themelore të caktojë masën e paraburgimit në afat prej 30 ditësh ndaj zyrtarit policor që u arrestua të hënën në Prizren veprën penale të “Marrje ryshfeti”.
Paraburgim u kërkua edhe ndaj të pandehurit B.C. (shtetas serb), për shkak të dyshimit të bazuar mirë se ka kryer veprat penale “Dhënia e ryshfetit”.
“Sipas kërkesës së prokurorisë, i pandehuri A.K., me datë 22.12.2025, rreth orës 08:10min, në Pikën Kufitare në Vërmicë, në cilësinë e zyrtarit policor, ka kërkuar dhe pranuar ryshfet nga B.C., me qëllim të përfitimit pasuror për vete. I njëjti, duke shfrytëzuar pozitën e tij dhe i veshur me uniformë zyrtare i ka mundësuar B.C., hyrjen në Republikën e Kosovës, ndonëse këtij të fundit, i ishte ndaluar hyrja në Kosovë nga Policia e Kosovës, për mungesë dokumentacioni. Pas marrjes së parave, A.K., e ka kaluar me veturën e tij ilegalisht kufirin bashkë me të pandehurin B.C., dhe e ka dërguar atë në Prizren”, shkruhet në njoftimin e Prokurorisë.
