Edhe përkundër që viteve të fundit në shkollat e vendit janë punësuar asistentë për fëmijët me aftësi të kufizuara, kjo kategori e fëmijëve dhe familjet e tyre vazhdojnë të përballen më sfida të shumta. Drejtues të shkollave dhe organizatave për mbrojtjen e fëmijëve, vlerësojnë së është tejet e nevojshme rritja e numrit të asistentëve në shkolla, pasi kjo do të kursente edhe buxhetin e familjarëve.
Fëmijët me aftësi të kufizuara në Kosovë përballen me sfida të shumta, e njëra ndër to është mungesa e asistentëve në shkolla për punën me këta fëmijë. Drejtoresha e Shkollës Fillore të Mesme të Ulët “Ismail Qemali” në Prishtinë, Mimoza Krasniqi, tha për Radio Kosovën se kjo shkollë ka mbi 60 fëmijë me aftësi të kufizuara, ndërsa aktualisht nga niveli komunal kanë të angazhuar vetëm 4 asistentë për fëmijët më aftësi të kufizuara.
“Këta asistentë i kemi caktuar nëpër ato klasa ku kemi raste me të rënda të fëmijëve, te ata fëmijë që kanë vlerësim pedagogjik komunal. Ndërsa fëmijët e tjerë nuk kemi arrit t’i mbulojmë, por prindërit e tyre detyrohen t’i paguajnë asistentët për fëmijët e tyre”, tha ajo.
Edhe Klevis Vaqari nga Koalicioni i Organizatave për Mbrojtjen e Fëmijëve, i tha Radio Kosovës se numri i profesionistëve dhe asistentëve të angazhuar nëpër shkolla nuk i plotëson kërkesat dhe nevojat e fëmijëve më aftësi të kufizuara.
“Ka nevojë për të rritur numrin e të gjithë profesionistëve mbështetës, qoftë asistentëve, qoftë profesionistëve të tjerë. Është i nevojshëm angazhimi i tyre, në mënyrë që të garantohet gjithëpërfshirja dhe kjo gjithëpërfshirje të mos jetë vetëm fizike, por të jetë me të vërtetë në funksion të arritjes së potencialit të plotë të fëmijëve të cilët kanë nevojë për profesionistë”, tha ai.
Kohë më parë Ministria e Arsimit ka premtuar se në vitin shkollor 2024/2025, në shkollat e rregullta fillore do të punësohen mbi 1000 asistentë arsimorë. Në lidhje më atë se sa është numri i asistentëve që aktualisht janë të angazhuar në nivel vendi, Radio Kosova, edhe përkundër përpjekjeve nuk ka arritur të marrë përgjigje nga kjo ministri.
