Kancelari i Gjermanisë, Olaf Scholz, ka kritikuar presidentin amerikan Donald Trump, që e quajti presidentin ukrainas Volodymyr Zelenskyy një “diktator”, transmeton Anadolu.
“Është thjesht e gabuar dhe e rrezikshme t’i mohosh presidentit Zelenskyy legjitimitetin e tij demokratik”, tha Scholz për revistën e lajmeve ‘Der Spiegel’.
“Është e vërtetë që Volodymyr Zelenskyy është kreu i zgjedhur i shtetit të Ukrainës. Fakti që nuk mund të mbahen zgjedhje të duhura në mes të një lufte është në përputhje me kushtetutën e Ukrainës dhe ligjet zgjedhore. Askush nuk duhet të pretendojë të kundërtën”, shtoi ai.
Kancelari gjerman kujtoi se ishte Rusia nën presidentin Vladimir Putin që filloi luftën në Ukrainë.
“Ukraina e ka mbrojtur veten kundër një lufte të pamëshirshme agresioni rus për gati tre vjet. Ditë pas dite”, tha Scholz.
Më herët, Trump e quajti presidentin ukrainas një “diktator pa zgjedhje” dhe paralajmëroi se “më mirë të lëvizë shpejt ose nuk do t’i mbetet një vend”.
Ai postoi në platformën ‘Truth Social’ disa orë pasi Zelenskyy u përgjigj në sugjerimin e tij se Kievi “nuk duhet ta kishte filluar kurrë” luftën, duke theksuar se presidenti amerikan po jetonte në një “flluskë dezinformimi” rus.
Trump ka avancuar negociatat për t’i dhënë fund luftës 3-vjeçare në Ukrainë, pa pjesëmarrjen e Kievit dhe qeverive të tjera evropiane. Ai tha se Evropa ka dështuar të sjellë paqen në Ukrainë dhe SHBA-ja po negocionon me sukses një fund të luftës.
