Prodhuesi spanjoll i çelikut “Sidenor” ka njoftuar sot se do të ndalojë gjithë tregtinë me Izraelin, sipas raportimeve të mediave lokale.
Muajin e kaluar, publikuesi irlandez “The Ditch” raportoi se kompania kishte dërguar 1.207 tonë shufra çeliku deri te prodhuesi izraelit i armëve “IMI Systems” gjatë një periudhe dhjetëmujore duke filluar nga gushti i kaluar.
Kompania me seli në rajonin e Baskisë, një nga prodhuesit më të mëdhenj të çelikut të specializuar në Evropë, tani do t’i ndërpresë të gjitha shitjet për në Izrael, sipas transmetuesit spanjoll “Cadena Ser”.
Sidenor tha se ndikimi ekonomik i vendimit është i vogël, me Izraelin që përbën më pak se 0,5 për qind të shitjeve të saj totale.
Ajo shtoi se ky veprim përputhet me thirrjen e qeverisë spanjolle për të ndërprerë tregtinë me Izraelin.
“Sidenor iu dorëzua presionit social”, tha ministri spanjoll i Çështjeve të Konsumatorit, Pablo Bustinduy, në platformën e medias sociale “Bluesky”.
Ai shtoi se ende po pret që kreu i konfederatës së biznesit të Spanjës t’i përgjigjet kërkesës së qeverisë për të “ndërprerë të gjitha lidhjet midis kompanive spanjolle dhe pushtimit, aparteidit dhe gjenocidit ndaj popullit palestinez”.
Qeveria e Spanjës ka thënë se ka pezulluar gjithë tregtinë e armëve me Izraelin që nga fillimi i sulmeve të tij në Gaza, megjithëse raportet kanë zbuluar se disa kontrata mbeten aktive.
Spanja ka qenë një nga kritikët më të zëshëm në Evropë të ofensivës izraelite, e cila ka vrarë më shumë se 56.600 njerëz dhe ka lënë qindra mijëra në prag të urisë.
Vitin e kaluar, Spanja bëri një hap drejt njohjes së shtetësisë palestineze.
Javën e kaluar, kryeministri spanjoll Pedro Sanchez kritikoi BE-në për dështimin në pezullimin e marrëveshjes së saj tregtare me Izraelin, pavarësisht “shkeljeve flagrante” të nenit të saj mbi të drejtat e njeriut./AA
