Pas takimit që pati me këshillat e prindërve të të gjitha shkollave, kryetar i Komunës se Lipjanit, Imri Ahmeti, bëri të ditur se takimi ka ndodhur me kërkesën e shumë këshillave të prindërve, natyrisht edhe të drejtorive të shkollave, pas debatit që është ngritur lidhur me tekstet shkollore për edukimin seksual.
“Është një reagim, do të thosha, unanim i të gjithë prindërve e të gjitha këshillave të klasave, e të gjitha të këshillave të shkollave. Natyrisht që mendohet se është i dëmshëm për shoqërinë tonë, i hershëm për shoqërinë tonë dhe në afatgjatë degjeneruese. Ky është një mendim dhe një konstatim i përbashkët i shumicës së këshillave dhe ne jemi dakorduar që mos të përfshihet fare në lëndën zgjedhore në asnjë shkollë tonë dhe këto tekste shkollore, nuk do të përdoren në Komunën e Lipjanit”, deklaroi Ahmeti.
Ai shtoi se në rrethanat e sotme është tepër e hershme të provohen këto eksperimenete me shkollat tona, me fëmijët tanë, sepse, vuri në dukje Ahmeti, duhet natyrisht një kohë afatgjate përgatitja e opinionit dhe fushata të ndryshme edukuese që do të mund të sensibilizonin dhe të promovonin vlerat të tilla që janë tepër të hershme për shoqërinë tonë.
“Ne akoma nuk e kemi mësimin tërëditor në asnjë shkollë për shkak të kushteve të cilat i kemi. Rrethanat tona nuk janë të favorshme për të hyrë në agjendat të tilla të cilat edhe në aspektin ndoshta të traditës tonë kombëtare janë tepër të dëmshme dhe të patolerueshme”, tha Ahmeti.rtk.
