Ka ditë që vala e nxehtë nga Afrika Veriore ka përfshirë Kosovën. Temperaturat janë thuajse tropikal
Qytetarët thonë se vështirë po i përballojnë temperaturat e larta
“Vështirë është. Normal temperaturat e larta janë pak ekstrem sidomos për neve në moshë. Kujdes duhet mirëpo kur ke punë me dal është pak vështir”, ka thënë qytetari Bardhyl Bajraktari.
“Shumë vapë e madhe është. Po e përballojë me vështirësi. Ka nevojë të ketë krua të ujit. Një ka qenë aty edhe atë e kanë mbyll. Po mbrohemi ndër hije, vazhdimisht po konsumojmë ujë”, ka thënë qytetari Bislim Ademi.
Si pasojë e këtyre temperaturave, është shtuar edhe numri i personave që kërkojnë ndihmë mjekësore, sidomos moshat më të ndjeshme si fëmijët e të moshuarit. Rekomandimet për të tejkaluar këtë valë të nxehtë, janë ato të zakonshmet.
“Duhet të evitohet dalja prej orës 10 deri në orën 16 të pasdites. Ambienti ku qëndrojmë duhet të jetë i freskët po ashtu edhe gjatë ditës por edhe gjatë natës duhet të krijohet një ambient i freskët duke i hapur dyert duke shfrytëzuar freskinë e ajrit që shtëpia e ambienti të freskohet. Të përdoren dhe shfrytëzohen kondicionerë të ajrit, të pihen sasi të mjaftueshme të ujit apo të lëngjeve duke përjashtuar lëngjet me sheqer. Duhet të shfrytëzohet uji i thjesht apo edhe çajra të ndryshme, të merren ushqime të lehta, veshmbathja duhet të jetë adekuate, me ngjyra të hapura. Në qoftë se dalin jashtë duhet të përdorin mjete ndihmëse mbrojtëse siç janë syzat, kapela, kremra me faktor mbrojtës nga veprimi i rrezeve ultra vjollce të diellit”, ka apeluar Florie Hyseni Morina, specialiste e Mjekësisë Familjare
Këto temperatura do të vazhdojnë së paku deri më 21 korrik.
“Po temperaturat do të jenë aty diku 38. Mund të arrijnë deri në 39 maksimumin por 38 janë të parashikuara në vendin tonë. Kurse në vendet fqinje do të kenë temperaturën mbi 40 gradë celsius. Shqipëria, Maqedonia dhe Mali i Zi do të kenë temperaturën mbi 40 , diku 42, 43 gradë”, ka thënë Besim Aliu, nga instituti Hidrometeorologjik.
Sipas parashikimeve të Institutit Hidrometeorologjik, në muajin gusht pritet të jetë më freskët sesa në muajin korrik.
