Komiteti Olimpik i Kosovës (KOK), bashkë me delegacionet e Komiteteve Olimpike të Francës, Shqipërisë, Malit të Zi dhe Maqedonisë së Veriut, në Prishtinë kanë nënshkruar memorandumin e bashkëpunimit “Balkan Cooperation 5”, transmeton Kosova Post.
Memorandumi i bashkëpunimit “Balkans Cooperation 5 (BC5)” do të vlejë deri në vitin 2028, ndërsa në ceremoninë e nënshkrimit u bë e ditur se në të përfshihen çështje të ndryshme të bashkëpunimit para dhe pas Lojërave Olimpike “Paris 2024”.
Bashkëpunimi në këtë memorandum do të përfshijë tre nivele, respektivisht nivelin sportiv apo bashkëpunim në nivelin operativ të sportit ku do të ketë bashkëpunim midis trajnerëve dhe referëve sportiv dhe organizime të ndryshme të kampeve të përbashkëta, nivelin administrativ në kuadër të së cilit u nënshkrua memorandumi i sotëm e që përfshin shkëmbimin e njohurive dhe bashkëpunimin e stafeve të komiteteve, si dhe nivelin diplomatik ku pritet të lobohet bashkërisht për përfaqësuesit e vendeve të njëri-tjetrit në pozita të ndryshme në institucione sportive ndërkombëtare.
Përfaqësuesit e komiteteve olimpike pjesëmarrëse në këtë memorandum e vlerësuan si historik nënshkrimin e këtij memorandumi dhe thanë se ky bashkëpunim lidh edhe më shumë mes vete vendet fqinje.
Presidenti i Komitetit Olimpik të Kosovës (KOK), Ismet Krasniqi, tha se kjo marrëveshje është shumë e rëndësishme për KOK-un dhe komitetet tjera nënshkruese.
“Besoj se do të jetë një mbështetje e madhe dhe ndihmë shumë e madhe ky bashkëpunim dhe besoj se shumë shpejt ky grup do të jetë edhe në Paris. Të vizitojë edhe Parisin dhe Komitetin Olimpik të Francës dhe të shohim edhe përgatitjet që po bëhen për Lojërat Olimpike Paris 2024″, tha Krasniqi.
Komiteti Olimpik i Francës u përfaqësua në nënshkrimin e memorandumit nga zv/presidenti i KO të Francës, Pierre Siutat, i cili u shpreh i lumtur që ndodhet në Kosovë, për të nisur një bashkëpunim mes komitetit të Kosovës, por edhe komiteteve të tjera olimpike fqinje.
Komiteti Olimpik i Shqipërisë u përfaqësua nga kreu Fidel Ylli, Komiteti Olimpik i Maqedonisë së Veriut nga Daniel Dimevski dhe Komiteti Olimpik i Malit të Zi nga Igor Vushuroviq.
Përfaqësuesit e komiteteve olimpike gjatë ditës u pritën nga zv/ministrja e Kulturës Rinisë dhe Sportit, Daulina Osmani, ku diskutuan për përgatitjet për Lojërat Olimpike “Paris 2024”, si dhe nga presidentja Vjosa Osmani dhe kryeministri Albin Kurti./aa
