Shkruan: Agim Vuniqi
Në kontekstin aktual të zhvillimeve politike dhe diplomatike, Kosova nuk ka luksin të devijojë nga angazhimi institucional dhe qasja serioze ndaj partnerëve ndërkombëtarë. Ajo që i duhet vendit sot nuk janë spektaklet mediatike apo konfrontimet e panevojshme publike, por qartësi politike, vendimmarrje strategjike dhe bashkërendim i brendshëm.
Mosmarrëveshjet e natyrshme ndërmjet subjekteve politike apo me partnerët ndërkombëtarë duhet të trajtohen brenda kornizës institucionale. Rrjedhja apo ekspozimi publik i bisedave konfidenciale përmes “barkçitjeve” politike është një akt i papërgjegjshëm që vetëm sa i dobëson pozicionet shtetërore të Kosovës në arenën ndërkombëtare. Kjo praktikë është e hidhur dhe e kobshme për interesin tonë kombëtar.
Në këtë kontekst, është e rëndësishme të kujtohet roli jetik që kanë luajtur Shtetet e Bashkuara të Amerikës në të gjitha fazat kyçe të shtetndërtimit të Kosovës. Historia e “Uncle Sam”, e lidhur me Samuel Wilson – furnizuesin e ushtrisë amerikane gjatë Luftës së 1812 – nuk është vetëm një tregim simbolik për kulturën amerikane. Ajo është metafora më përfaqësuese e përkrahjes së SHBA-së për lirinë dhe vetëvendosjen e popujve.
Që nga ndërhyrja e NATO-s në vitin 1999, deri te shpallja e pavarësisë më 2008, shqiptarët dhe Kosova nuk kanë qenë kurrë më afër realizimit të aspiratave të tyre historike për një shtet të lirë, demokratik dhe të pranuar ndërkombëtarisht. Por ky projekt madhor nuk është i përfunduar. Ai kërkon konsolidim të brendshëm dhe vazhdimësi të përkrahjes ndërkombëtare, veçanërisht nga SHBA-ja.
Portreti legjendar “I WANT YOU” i James Montgomery Flagg, i përdorur për të mobilizuar rekrutët amerikanë në Luftën e Parë Botërore, është më aktual se kurrë: ai përfaqëson një thirrje për përkushtim, përgjegjësi dhe veprim në mbrojtje të vlerave demokratike. Sot, Kosova ka nevojë për këtë lloj vetëdijeje.
Në vend të përplasjeve të kota, na duhet që liderët tanë të rreshtohen me interesin shtetëror, të ruajnë marrëdhëniet strategjike dhe të veprojnë me urtësi. Sepse për ta përmbyllur projektin tonë kombëtar dhe për të arritur njohjen e plotë ndërkombëtare, përkrahja e “Uncle Sam” nuk është një mundësi – por një domosdoshmëri.
