Derisa edhe pak ditë e ndajnë vendin nga zgjedhjet e parakohshme të 28 dhjetorit, Komisioni Qendror i Zgjedhjeve ka sqaruar se si do të veprohet më 31 dhjetor, në natën e ndërrimit të viteve, dhe ditën e parë të vitit 2026, më 1 janar.
Zëdhënësi i KQZ-së ka bërë të ditur se në ditën e fundit të vitit, numërim votash do të ketë vetëm deri në ora 12:00 të paradites, ndërkaq numërimi në Qendrat Komunale do të rifillojë më 1 janar nga ora 16:00.
“Duke pasur parasysh faktin se jemi në periudhë festash, por edhe domosdoshmërinë që procesi i numërimit të mos ketë ndërprerje të gjatë, më 31 dhjetor do të punohet deri në orën 12:00, ndërkaq, puna në Qendrat Komunale të Numërimit do të vazhdojë më 1 janar, në orën 16:00”, tha Elezi për RTKlive.
Në Qendrat Komunale të Numërimit në gjitha komunat e Kosovës kryhen aktivitete të rëndësishme, siç janë verifikimi i rezultateve të subjekteve politike pas numërimit të fletëvotimeve në vendvotime dhe numërimi i votave të kandidatëve për deputetë.
“Sipas Ligjit për Zgjedhjet e Përgjithshme, në zgjedhjet për Kuvendin e Kosovës, numërimi i votave të subjekteve politike bëhet në vendvotime dhe rezultatet evidentohen në formularë të rezultateve, të cilat pastaj publikohen nga KQZ si rezultate preliminare. Po sipas të njëjtit ligj, në Qendrat Komunale të Numërimit, do të bëhet numërimi i votave të kandidatëve për deputetë të Kuvendit të Kosovës. Para numërimit të votave të kandidatëve për deputetë, sipas Rregullores Zgjedhore të KQZ-së për QKN, në këto qendra bëhet verifikimi i rezultateve të subjekteve politike nga formularët e plotësuar në vendvotime pas numërimit të fletëvotimeve”, sqaroi ai.
