Trupi gjykues në Dhomat e Specializuara në Hagë është kritikuar disa herë nga mbrojtja e ish-krerëve të UÇK-së se po tregohet i njëanshëm në pyetjet drejtuar dëshmitarëve. Këto kritika i kanë mohuar gjyqtarët e Speciales. Ndërsa, avokatët kosovarë të licencuar nga Specialja, thonë se trupi gjykues bën pyetje në favor të akuzës.
Në nëntor të vitit të kaluar, mbrojtja e ish-krerëve të Ushtrisë Çlirimtare të Kosovës ia kishin nisur një kërkesë trupit gjykues në Dhomat e Specializuara në Hagë, përmes së cilës kishin kërkuar nga gjyqtarët që mos t’ia mbajnë anën prokurorisë, por të jenë të paanshëm në pyetjet e tyre.
Kësaj dhe ankesave të shpeshta të mbrojtjes së Hashim Thaçit, Kadri Veselit, Jakup Krasniqit dhe Rexhep Selimit i është përgjigjur trupi gjykues në krye me Charles Smith. Në përgjigjen e publikuar në faqen e Speciales, thuhet se avokatët nuk kanë ofruar raste konkrete ku paneli kanë paragjykuar, raporton RTK.
Sipas trupit gjykues, Paneli ka fuqi të gjerë për t’u bërë dëshmitarëve çdo pyetje që gjykohet e nevojshme për sqarimin e dëshmisë të tyre.
“Në lidhje me çdo paragjykim ndaj mbrojtjes, Paneli rikujton se Mbrojtja ka të drejtë të rihapë pyetjen e tyre në bazë të pyetjeve të bëra dëshmitarëve nga Paneli ose të kërkojë më shumë kohë për të shqyrtuar dokumentet nëse është e nevojshme”, thuhet ndër tjerash.
Se trupi gjykues po mban anë, konsideron avokati i licencuar nga Gjykata Speciale, Skënder Musa.
“Kjo gjykatë që nga fillimi ka qenë e njëanshme në tërësi, gjyqtarët nuk e kanë rujt subjektivitetin, shihet që gjyqtarët parashtrojnë vetëm pyetje që shkojnë në favor të akuzës. Kritika e gjithë opinionit dhe shumicës së juristëve në Kosovë është që gjykata, pra gjyqtarët kanë qenë objektiv, shpesh herë krijohet një lloj përshtypje që i kemi vetëm dy palë, prokurorinë dhe gjykatën në njërën anë dhe të akuzuarit dhe mbrojtësit e tyre në anën tjetër”, tha Skënder Musa, avokat i licensuar.
Edhe në Institutin e Kosovës për Drejtësi thonë se trupi gjykues duhet të jetë objektiv në pyetjet e bëra.
“Është me rëndësi të fokusohemi te objektiviteti i procesit dhe ne mendojmë që sidomos trupi gjykues duhet të jetë objektiv dhe ky proces të përfundoj sa më shpejt që është e mundur, gjithmonë duke mos u thirr në përfundimin e shpejt dhe në të njëjtën kohë të dëmtohet si proces, por të përfundoj si proces në bazë të provave të cilat i kanë prezantuar palët në procedurë”, tha Astrit Kolaj nga IKD.
Deri më tani në këtë proces gjyqësor kanë dëshmuar 123 dëshmitarë të Prokurorisë, e cila ka paralajmëruar se deri më 4 prill do të përfundojnë dëshmitë e saj, për të vazhduar me ata të mbrojtjes së viktimave dhe të mbrojtjes së të akuzuarve.
