Pas dorëheqjes së kryeministrit serb Millosh Vuçeviq, mes protestave masive antikorrupsion, presidenti Aleksandër Vuçiq foli për mundësinë e mbajtjes së zgjedhjeve të parakohshme në muajin prill.
Gjatë një fjalimi televiziv mbrëmjen e së martës, Vuçiq tha se partia e tij do të merrte 10 ditë kohë për të vendosur nëse do të krijohej një qeveri e re pas konsultimeve me të gjitha palët apo nëse do të shkonin në zgjedhje. Sipas tij, mundësia e krijimit të një qeverie të përkohshme tranzicioni, nuk është në tryezë… Deklarata shënon një kthesë të rëndësishme për Vuçiqin, partia e të cilit fitoi lehtësisht zgjedhjet e parakohshme në vitin 2023, por që kohet e fundit, ka qenë nën presion të vazhdueshëm.
“Pasi dorëheqja e Vuçeviq të konfirmohet, nis periudha 30-ditore gjatë së cilës zhvillohen procedurat e nevojshme për zgjedhjen e qeverisë së re. Nëse qeveria nuk do të formohet për 30 ditë, do të thirren zgjedhjet e parakohshme”, u shpreh Vuçiq.
Dorëheqja e Vuçeviq ka shtyrë opozitën të kërkojë formimin enjë qeverie të përkohshme. Partia e Kreni-Promeni kërkon që ajo të përbehet nga ekspertë të aprovuar nga studentët, të cilët nisën protestat, ndërsa u bën thirrje partive të tjera opozitare të mos i bojkotojë zgjedhjet, nëse do të mbahen.
Kryeministri Vuçeviq u bë zyrtari më I lartë që u dorëhoq pas zemërimit publik që shpërtheu si pasojë e shembjes së një strehe betoni në një stacion hekurudhor në Novi Sad, ku vdiqën 15 persona. Stacioni i ishte nënshtruar rinovimeve 2 herë dhe qytetarët bëjnë fajtor korrupsionin e përhapur në qeveri.
Ato që fillimisht nisën si grumbullime të vogla janë përhapur në të gjithë vendin, teksa me mijëra studentë, mësues e punonjës të tjerë kanë dalë sistematikisht në rrugë, shkruan A2CNN.Vuçeviq pretendon se qeveria I ka përmbushur të gjitha kërkesat e protestuesve, përfshirë publikimin e dokumenteve që lidhen me rinovimin e stacionit por manifestuesit janë zotuar se nuk do të ndalen.
