Nga Gani Qarri
Sa më larg projektuesve të ngërçit
Tendencat e partive të inkriminuara, për të vazhduar me deputet të nënshtruar dhe pa uni personal, edhe në zgjedhjet e reja parlamentare, me të cilët ekziston rreziku real që të njëjtit, ta rikthejnë serish Kosovën në bllokadë të pa-rrugëdalje dhe inskenojnë përsëri ngërçin e mëparshëm shumë mujor politik, me përsëritjen e njohur të akteve të periudhës së më parme mbi 9 mujore, do të ishte vërtetë skandali më i rëndë politik, aventurë e pafalshme moralisht e kombëtarisht edhe për votuesit e mbarë vendit, si dhe sfidë shumë e rrezikshme dhe e pa-bërballushme për shtetin e ri të Kosovës.
Dhe sikur mos të mjaftonte vetëm kjo, po ato parti, kanë rezervuar vende edhe për kandidatët e dështuar të grupeve shterpe, që u janë bashkuar në aksham-pazaret e fundit, vetëm për gllabërimin e ndonjë posti, përfshi edhe figura të diskutueshme e pa asnjë meritë dhe-me të kaluar penale e përndjekje të gjata gjyqësore, gjë që vërtetë përbënë problem serioz edhe për daljen e qytetarëve në zgjedhje.
Madje përkundër pretendimeve publike se çdo emër në listat e përzgjedhura për deputet, qëndron mbi vlerat dhe “dinjitetin” e kandidatit, gjoja të bazuara edhe në “besimin për shërbim ndaj qytetarëve” dhe pretendimet për freskimin e emrave për deputetë, partitë politike që marrin pjesë në zgjedhjet e jashtëzakonshme të 28 dhjetorit për Kuvendin e Kosovës, në shumicën e rasteve, po dëshmojnë se i kanë hy garës me përbërjen pothuajse të njëjtë të gardave konspirative, të përbëra nga deputetët bllokues të institucioneve të shtetit, që bartin në vete rrezik për dëmtime tjera të mëdha të Republikës së Kosovës.
Emra të tillë vejnë edhe votuesit e sinqertë në siklet dhe krijojnë shqetësime sereioze edhe mbi të ardhmen e sigurisë politike të Kosovës, derisa dihet mirëfilli se po këta deputet matrapaz, lanë vendin edhe pa buxhet të votuar dhe pa marrëveshje të miratuara ndërkombëtare, duke i shkaktuar Republikës së Kosovës mbi 200 milion humbje nga ndihmat ndërkombëtare të BE-së dhe Bankës Botërore, të cilat për shkak të mosvotimit të marrëveshjeve nga deputetët opozitar, mund ti marrë Serbia dhe shtetet tjera hegjemoniste fqinje.
Me veprime të tilla skandaloze, përveç shkaktimit të humbjeve prej qindra miliona eurove të ndara nga BE dhe Banka Botërore për Kosovën, të njëjtit deputetët edepsëz të cilët për 9 muaj me radhë mbajtën të bllokuar gjithë jetën politike në Republikën e Kosovës, tani kanë sy e fytyrë, që të rikandidojnë dhe ta kërkojnë përsëri votën për deputet, ani pse populli i Kosovës i njeh mirë dhe e din shumë qartë se po këta matrapazë, me mosvotimin e buxhetit të shtetit dhe të marrëveshjeve ndërkombëtare kanë rrezikuar qëllimisht edhe funksionalitetin e shtetit, përkeqësuan qëllimisht jetesën e qytetarëve dhe kishin për synim, nxitjen e trazirave sociale në Kosovë.
Për aq më tepër edhe në këto zgjedhje parlamentare, emrat kryesor të kandidatëve për deputet vijnë, po nga rrethi i afërt i kryetarëve të partive të inkriminuara dhe njerëzve të preferuar prej tyre, apo edhe parashutistë të katapultuar nga jashtë, pa asnjë meritë në parti dhe pa asnjë kontribut në politikën e vendit, e jo emra meritor e të dëshmuar në vepër, të propozuar nga baza e gjerë e partive, për të cilët çështje me prioritet mbetet vetëm sigurimi i mandatit të deputetit dhe jo forcimi i partisë në emër të së cilës padrejtësisht garojnë, as avancimi i shtetit, nga i cili pretendojnë të marrin pagat e majme të deputetëve, pa punuar fare e pa kontribuuar me asgjë, madje edhe duke penguar, me këmbë e me duar, mbarëvajtjen e shtetit të Kosovës.
Njerëz absolutisht të pa mbështetur nga anëtarësia, as të dalë nga diskutimet serioze në mjediset e gjera të anëtarësisë së partisë, por vetëm të “besuar” të kryetarëve të segmenteve politike, ku realisht edhe në listat e dorëzuara të kandidatëve për deputet, për zgjedhjet e 28 dhjetorit, shihet qartë se mbizotëron, jo merita as arsyeja e shëndoshë, por vendimi i kryetarëve të partive të inkriminuara, të cilët e kanë fjalën kryesore edhe në përzgjedhjen e emrave dhe janë përcaktues dominues të kandidatëve, sipas pëlqimit personal të kryetarit të partisë, që për habi, do ta përbëjnë listën e propozuar, aspak transparente për deputet edhe në këtë proces zgjedhor parlamentar.
Andaj përkundër fjalamanisë së fryrë propaganduese se kinse në listën e kandidatëve për deputet janë futur figura me potencial elektoral që do ta “rrisin maksimalisht” numrin e votave, në lista janë përfshirë edhe persona me të kaluar të dyshimtë kriminale, të mbarsur me akte të dënueshme ligjore.
