Kryeministri në detyrë i Kosovës, Albin Kurti, ka deklaruar se mosfunksionimi i Kuvendit përbën një humbje kohe dhe dëm për vendin, duke theksuar se Kosova nuk ka kohë për të humbur dhe se institucionet duhet të rifillojnë punën sa më parë.
Kurti,në një deklaratë për media, ka nënvizuar se procesi për zgjedhjen e kryetarit dhe katër nënkryetarëve të Kuvendit tashmë është përmbyllur, por ka mbetur i pazgjedhur nënkryetari nga komuniteti serb.
“Konsideroj që është humbje kohe dhe dëm që nuk po funksionon Kuvendi i Kosovës. Kuvendi i Republikës e ka zgjedhë kryetarin Dimal Bashën, i ka zgjedhë katër nënkryetarët Albulena Haxhiun, Vlora Çitakun, Kujtim Shalën dhe Emilja Rexhepin askush nuk është duke e zënë karrigen e zbrazët për nënkryetarin nga radhët e komunitetit serb. Është dashur të vazhdoj puna e Kuvendit sepse shteti i Kosovës nuk ka kohë për të humbur”, ka thënë Kurti pas inaugurimit të një çerdheje në Shtime.
Ai ka theksuar se votimi për Emilja Rexhepin është përfundimtar dhe nuk mund të anulohet, ndërsa mbetet vetëm një vend bosh për përfaqësuesin serb në kryesinë e Kuvendit.
“Emilja Rexhepi është nënkryetare e Kuvendit, dhe votimi për të nuk mund të anulohet. Prandaj kemi ngelur vetëm te nënkryetari i fundit nga komuniteti serb. Por mos harroni, nuk janë serbë vetëm ata të Listës Serbe, serb është edhe Nenad Rashiq”, ka theksuar Kurti.
Sipas tij, kandidati i Listës Serbe ka marrë vetëm 10 vota, ndërsa Nenad Rashiq ka marrë 56, duke shtuar se me pak mbështetje nga ish-opozita, ky ngërç do të ishte tejkaluar.
“Vetëm pesë vota t’ia jepnin këta 52 që janë të opozitës, sot nuk ishim duke i bërë këto pyetje dhe këto përgjigje”, ka theksuar Kurti.
Gjykata Kushtetuese më 30 shtator ka publikuar njoftimin për vendimin për seancën konstituive pas ankesës që e kishte marrë nga Lista Serbe, konkretisht lidhur me votimin ndaras të kandidatëve për nënkryetarë të Kuvendit nga radhët e pakicave.
Në fund të gushtit, kryeparlamentari Dimal Basha e ka shpallur të konstituuar legjislaturën e nëntë, edhe pse dështoi votimi për një nënkryetar nga komuniteti serb.
Kushtetuesja ka thënë se seanca konstituive nuk ka përfunduar atë ditë e në arsyetim ka dhënë moszgjedhjen e nënkryetarit serb.
Në vendim, Gjykata nuk e ka konsideruar në asnjë pikë jokushtetuese ndarjen e votimit për nënkryetarët nga komunitetet.
Në vendimin e saj, Kushtetuesja ka urdhëruar të gjithë deputetët që gjatë procedurës së zgjedhjes së nënkryetarit të Kuvendit nga radhët e deputetëve të komunitetit serb, të ushtrojnë funksionin e tyre në interesin më të mirë të Kosovës dhe në pajtim me Kushtetutën.
Gjykata Kushtetuese nuk e ka publikuar ende aktgjykimin e plotë.
